ھەوای وەیشوومەی مەیلەکەی دڵدار
مەزرەعەی شادیم فەوتان وە یەکجار
خسووسەن وەفا و جەور ڕووزگار
گرەو بەردەوە جە بێ مەیلی یار
دڵ چ قەید غەم ئازاد نمەبۆ
ذەروازەی شادی گوشاد نمەبۆ
تا ئوردوی شادی وەسڵەکەی ئازیز
ماوای سوپای غەم نەکەرۆ ناچیز
با دڵ وە حەربەی موژگان دڵدار
ناوەروو زامی چەم نەبوو خوونبار
سا بەختە ئاوێ بدو وە چەمدا
با تابوور غەم بدو وە ھەمدا
ئەی بەخت و زەمان، ئەی جەور و ستەم
مەینەت و جەفا، غەم وەبان غەم
یا ڕەب وە حاجەت ڕەسوول ئەکرەم
یاران وێنەی من نەوینان وە چەم
پەشێوم وێنەی قەیس عامیری
ناوم نەجمەدین لەقەب سابیری
يا مالك الملك، ستار العيوب
وەنەم ببەخشی سەبرەکەی ئەییووب
یا دڵەی غەمگین وە وێنەی یەعقووب
ئاخری ڕۆژێ بگەم بە مەتلووب
بە جاھ ئایەی سبع المثاني
شادم کەی وێنەی پیری کەنعانی
سابیری نەخۆش بێ دەوا و تەبیب
سەبر کە ضرب الحبيب زبيب