حەز دەکەی نەچیە ژێر زنجیر و کۆت
دامەزرێ لە سەر پەت و سینگی خۆت.

کێ ڕازی نەبێ بە بەخت و بەشی
تەمەن سەر دەبا بە چارەڕشی.

ژن دەڵێ نانی وشکیم دەست کەوێ
خۆشە، نەک پڵاو لە پەنای هەوێ.

پاشایەتییە ماڵی بەتەنێ
کیتەڵەی تەنێ، بەهەشتی بەنێ.

قازانی مێردان بە حەوت ساڵ جارێ
دێته کوڵ، بەڵام دەڕژێ بە جارێ.

مشتەی هەمانە و داسی ڕەمانە
زۆر باوە لە ناو دۆستی زمانە.

بۆیە وەڕەز بووم من لەم ژیانە
ڕێوی لە حاستم شێری ژیانە.

خراپت بۆ خۆت دانەنا کاکە
خوداش و خورماش، تەگبیری چاکە.

ئازا کوڵی دڵ دەڕێژێ بە قین
بێ دەسەڵاتیش بە گریان و شین.