وەرە و بە نووری جەماڵت شەوم مونەووەر کە
بە بۆنی عەتری گوڵت مەجلیسم موعەتتەر کە

ئەمن به چاو و برۆی ويم سپاردووە دڵ و گيان
سەياحەتێکه وەرە سەيری تاق و مەنزەر کە

به دەرکەوانی بەھەشتێ بڵێ له مەجليسی مه
لەباتی عوودی، بڕێ گڵ بەرە و له مەجمەر که

له تيشکی ڕووتەوە چاوی دڵم به تاو ئەنگووت
کەرەم که خۆر و سەراپەردەکەی مونەووەر که

ستێرەيی شەوی دووری گەلێ کەمه نووری
بڕۆرە بان، له سەرت ڕۆشنی قەمەر ئەرکه

گوڵاڵەکانی چەمەن ژێر دەستی جوانی تۆن
منەت لەسەر سەمەن و ناز لەسەر سنەوبەر که

نەفس فزووله، قسان زۆر دەکا، بەڵام ساقی
ئەتۆ لەدەس مەدە ئەو کارە، مەی له ساغەر که

حەدم چییە که تەماعێ له قەندی وەسڵت کەم
کەرەم بفەرموو حەواڵەم به لێوی شەککەر که

پياڵه ماچ که، لە پاشان بەڕێی که بۆ مەستان
دەماغی عەقڵ بەوێ ڕەسمه پڕ له عەنبەر که

ئەگەر فەقێ بەتەما بوو ھەڵەت بکا له ئەوين
پياڵەيێکی دەیە و پێی بڵێ دەمت تەڕ که

بە خوڵقی خۆش و جوانت که شۆقی داوە بە شەم
وەرە و له بەزمی مەدا چلچرا به شەم دەرکه

لە خەرقەپينەکراوی خوری وەتەنگ ھاتووم
بە ناز و غەمزەیی سۆفی‌کوژم قەلەندەر که

بەمن دەکەی وەرە پاش عەیش و نۆش و دڵداری
کەلامی خواجه لەبەر که و نەشەم بە دڵ وەرکە