ئەی شنەی بای سەحەری کوێیە ئەرێ منزڵی یار؟
کامە جێی دڵبەری عاشق کوژی شۆخی نازدار؟

شەوەزەنگە و سەفەریم، ڕێگەمە چۆڵگەی ئەیمەن
کوا گڕی توور و قەرار و بڕی وادەی دیدار

هەر کەسێ دێتە جیهان حاڵەتی مەستانی هەیە
لەو سەراکۆنەیە بۆم پرسە ئەدی کوا وشیار؟

شارەزای ڕەمز و ئیشاڕانە شیای مزگێنی
ڕیزەکاری لە ئەویندا نییە هەروا ساکار

بە هەزار کاری بە تۆیە چڵی هەر موویەکی من
چم لە تانە و تەشەری ڕەخنەگرێکی بێکار

زولفی زنجیری دەوێ، شێت بووە لێم عەقڵ و دڵیش
زیزە، خۆی داوە لە ژێر سووچی برۆیدا حاشار

گشتی ئامادەیە بادە و گوڵ و موتریب ئەمما
یارە جێی خاڵییە، کەلکی نییە عەیشی بێ یار

دڵ لە تەکیەی بە خەم و خەڵوەتی شێخی وەڕەزە
کوێیە مەیخانەکە، لە کوێیە کچی چاو بە خومار؟

بای خەزان بۆ چەمەنی ژینە مەڕەنجە حافز
باشی بیر لێکەوە، کێ دیویە گوڵێکی بێ‌خار