حافزەکەی گۆشەگر دوێکە لە مەیخانە بوو
وازی لە پەیمان نەما ئۆگری پەیمانە بوو

دۆستی دەمی لاوەتی هاتە خەوی دوێ شەوێ
بۆیە بە پیری سەری عاشق و دێوانە بوو

ڕێگری دین و دڵان بەچکە فەلێک ڕادەبرد
بوو بە ڕەفیقی ئەو و زوو لەمە بێگانە بوو

بولبولی سووتاند ئەگەر ئاگری ڕوخساری گوڵ
ڕووی گەش و ڕوونی شەمیش ئافەتی پەروانە بوو

سۆفییە شێتەی کەوا جام و پیاڵەی شکاند
دوێکە بە یەک چۆڕە مەی عاقڵ و فەرزانە بوو

شینی بەیان و شەوم زایە نەبوو خوا شوکر
قەترەیی ئەشکم بەهای گەوهەری یەکدانە بوو

ساقیە چاو مەستەکەم ئایەتی سیحرێکی خوێند
مەجلیسی خەتم و وەعز گشتی بە ئەفسانە بوو

مەنزڵی حافز کەوا بوو بە سەرای بەزمی شا
گیان و دڵیشی لەلای دڵبەری تاقانە بوو