ئەی سەگی دەرگات لە من پاکتر^١
چاکتر و چالاکتر و بێ باکتر^٢

ئەو هەموو دەم کایه دەکات و گەمه
ساغ و سەلیم، تێروپڕ و بێ‌خەمە

من بە زگی برسیی و لات و کزم
ناگەمە دز، ناوەڕم و ناگەزم

ئەو نە خەمی نان و نە ئاوی هەیە
هەرچی کە پێویستە تەواوی هەیە

ئەو، لەشی بۆنخۆشی گوڵاوە، گوڵاو
من بەدەنم پیسە، گڵاوە، گڵاو

ئەو نە خەمی کەس، نە خەمی خۆی هەیە
چونکە هومێدی کەرەمی تۆی هەیە

خۆ منیش ئەی خاوەنی خوانی کەرەم! ^٣
پیرەگەماڵی دەری تۆم، هەرچی هەم

من شەل و پیر و کەسەل و ڕەنجەڕۆ
ڕووم ئەوه کردۆتەوه بەر دەرکی تۆ

گەرچی ئەمن زاهیرەکەم 'کامڵ'ـە
خۆ به یەقین باتینەکەم باتڵە