تۆ بە زەخمی مەعدەوە دەتلێیەوە
من بە دەردی مەرگەوە دەخولێمەوە

جەرگ و دڵ بۆ تۆ برینداره 'عومەر'!
هەر ببیسم عاجزی، دەکولێمەوە

یاخودا دەردت له ڕۆحی من کەوێ
گەر قەزای تۆم لێ‌کەوێ دەژیێمەوە

تۆ بمێنی، نـۆجـوانی‌، چاترە^١
من که پیرم با بڕۆم، ببڕێمەوە

مامەکەت چەند ڕۆژه بۆت بۆته کەباب
لێم‌گەڕێ یەک‌جاری هەڵقرچێمەوە

زۆر بەهارێکی سڕوسارده له من
وشک هەڵاتووم، تازه نابووژێمەوە

جا مەگەر تۆ بێیەوه بۆکانێ زوو^٢
با منیش بۆ لات بە خۆشی بێمەوە