ڕەحمێ به دڵی شێتم، بێ‌تاقەت و خەمبارم^١
هەر ڕەعیەتی بەرپێتم، بێ‌کارم و پاکارم

مالیک نییه غەیری تۆ، مڵکیش هەموو هەر هی تۆن
ڕێگەم بده یا ڕەببی! بێ‌مەلجەء و ناچارم^٢

ئەی خالیقی ڕۆژ و شەو! ڕۆژم ڕەشه هەروەک شەو
دوورکەوتوو له یارانم، هەمسایەیی ئەغیارم

جاران وەکوو شا وا بووم، شای دوورەخەم و دڵ‌خۆش
ئێستا کز و سیسی خەم، بەر تانە و پللارم^٣

ئەو دوژمنی ئەمڕۆکه، دوێنێکه ڕەفیقم بوون^٤
وا مامەوه تەنیا من، بێ‌هەمدەم و بێ‌یارم

جاران وەکوو بولبول بووم بۆ مەدحی گوڵستانم
ئێستا له قەڵەم کەوتووم، بێ‌سەوزه و گوڵزارم

شێواو و پەرێشانم، بێ‌دەنگم و دەشناڵم
گریانم و خەندانم، خۆشنوودم و بێزارم

تۆ مالیک و من مەملووک، تۆ خالیق و من مەخلووق
موستەوجبی ڕەحمی تۆم، یا ڕەببی گونەهـ‌بارم!

مەخدووشه لەف و نەشرم، مەغشووشه هەموو فکرم
تێک‌چوون به غەم و غوسسه، ئەفکارم و ئەشعارم

ئەمما بە خوداوەندیت، ئەم عەبده زەلیلەی خۆت
ئەم‌جاره نەجاتی دەی، هەرچەنده گرانبارم

باری گونەه‍ و عیسیان، وا پشتی جدەو کردم
ڕەوتم هەموو لێ‌تێک‌چوو، وا هێنده بەئازارم

'کامیل' وەره سەیری دڵ! خۆش‌نەغمەیه وەک بولبول
خۆش‌ڕەنگ و جوان وەک گوڵ، هەرچەند بە مەسەل خارم^٥