ئەی خەم تەشریف کەر یاگەت بەتاڵەن
شادی کۆچش کەرد ئاماش مەحاڵەن
مەکەرۆ تەقسیر نەوبەت ئاما پێت
وێران کەر ئەمجار یەکسەر ماوای وێت
وە هووناو کەرۆ دڵەی سیا چار
باوەر لێڵایی دیدەی ئەسرین بار
بەرکەندۆ ڕیشەی نشاتم جە بێخ
جگەر قیمە کەر پەی کەباب وە تێخ
وە دۆی هەناسەی چیای زەبوونم
جەلا دەر وە نار کوورەی دەروونم
مالووم بۆ جەلات من کووس تۆمەن
نەوبەی ئازێتی زایەڵەی ڕۆمەن
----------
خوا نەکەردە شۆخی شیوا شەم
مەواچان دیسان قارش گرتەن لێم
وەی ڕۆ پەی خەوەر یاوەنان وە پێم
----------
ڕیسوا و حەیران وێم جە دەردی وێم
وەی ڕۆ پەی دڵەی زام گرتەی کاریم
پەی شەرارەی ئێش دەرد نادیاریم
مینە وەس کەرە زایەڵە و زاری
تەڵەب کەر عیلاج نە دەرگای باری