موددەتێکە دڵ بە تیری عەشق دەردی کارییە
هەر وەکوو بولبول دەناڵێ شیوەن و هاوارییە
خۆر ئەنیشێ تا بەیانی فەجر ئەدا تاکوو غورووب
ناڵە و گریانمە هاوارە لەم بیمارییە
حەربەیی شمشێری ئەبرۆت دای لە ڕۆحم بوو بە زام
بێ دەوا کەوتۆتە ناسۆر وەسڵەکەت تیمارییە
من نەخۆشی دەردی عەشقم ئەی تەبیب تۆ بی و خوا
لێمگەڕێ با بمکوژێ بمرم بە ئەم بیمارییە
نیەتی نوێژم بەتاڵە چونکە تۆم وای لە خەیاڵ
ویرد و ئەورادی زوبانم ئەی نیگارا ڕازییە
ئێش و ناڵە و دەردی دووریت گشتی لای من کەوتە یەک
بەم سێ ئێشە زۆخ لە جەرگ و خوێن لە چاوم جارییە
زیندەگیم لا تاڵە جانا بێ تۆ ژینم مردنە
بۆ خوا چارەم چییە چبکەم لە ئەم ئەوگارییە
مینە پیشەی ماهڕوویان خوێنی عاشق ڕشتنە
نابێ تۆ دڵگیر ببی چون ڕەویەمان خوێنخوارییە