حاجی ئالووسەن...
سەراسەر جیهان یەکسەر ئالووسەن
فیرقەی یارستان بەندی و مەحبووسەن
مزگان مزگانەن وەخت جلووسەن
گرۆی مونکیران مات و مەئیووسەن
یەی حاڵ وێشان هەر جە ئەفسووسەن
دونیا تار و تەم چون ئابنووسەن
کەللەی بەدکاران جە خاک مەدیووسەن
پەرێ هەقیقەت بەندە جاسووسەن
بەد بەختی تاڵع گشت بێ نامووسەن
برات خۆی مەراق ئەکل و مەلبووسەن
ئیسلام پایماڵ دەورەی مەجووسەن
دەنگ کەڕنا و سەدای ناقووسەن
فەتح موزەفەر هەر جە قودووسەن
پەرێ یارستان گفتەم مەخسووسەن
بەندەی کەمتەرین وێنەی سالووسەن
مەبۆ نیگوون بۆ کاسە مەترووسەن
جیهان مەعموورەن عەجەب مەرسووسەن
زات گیو جاڕچی سوپادار تووسەن
وەلوەلەی ڕووی ئەرز دەنگ سەدای کووسەن
دەفتەر دار هەق کاتیب نفووسەن
مەئمووران مەشغوڵ دەرس درووسەن
چەرخ کەچ ڕەفتار دەوری مەنحووسەن
دین بی وە دینار ئیمان فلووسەن