ئاڵەکۆک

پیرەمێرد add_a_photo
بەردتاشێک عەشقی خوای کەوتە سەر
خوای خۆش ئەویست و لەڕا بێ خەبەر

بۆ خواپەرستی چوە کێوی (توور )
شاخەکەی تاشی بۆ خۆی کرد بە ژوور

وای ئەزانی خوا وەک ئێمە وایە
دەربەستی نان و نوێن و کەوایە

ئەیوت: خوای خۆم بینایی چاوان
ڕۆژێ وەرە لام ببە بە میوان

دەست و پێت ئەشۆم بە سابوون و ئاو
ناڵچەی پێڵاوت ئەخەمە سەر چاو

ئەچم لە لای شوان شیرت بۆ دێنم
عوود و بخوردت بۆ ئەسووتێنم

ماندووی سەرخەوێک بشکێنە لە لام
ئێشکت ئەگرم، مەترسە ئازام

ئەپاڕایەوە و ھەروا ئەیناڵان
بە سۆز و گریان جەرگی ئەسووتان

تا ڕۆژێ مووسا چووە کێوی (توور )
گوێی لە دەنگێ بوو ئەیناڵان لە دوور

چوو پێی وت: کابرا بۆچ تۆ نازانی؟
خوا بەشەر نییە بێت بە میوانی

جارێک من وتم: خۆتم نیشان دە
فەرمووی: نامبینی، خۆت ئەزیەت مەدە

سەنگتەراش گریا: بە دڵ‌شکاوی
خوا فەرمووی: مووسا تۆ ناتەواوی

خۆشەویستی من بۆچ ئەڕەنجێنی؟
ئەو دڵەی منی تیام ئەیشکێنی؟

ئەوی بە زبان زکری من ئەکا
ھیچە، ئەم بۆ من، وا کێو کون ئەکا
دیوانی پیرەمێرد، پێداچوونەوەی: ئومێد ئاشنا، بەرگی دووەم، لاپەڕە ٥۱و٥۲.
نووسین: کەماڵ ڕەحمانی

پەراوێز edit