کە مەجنون کەوتە خەڵوەتخانەیی خاک
ندایەک هات لە قوببەی بارەگای پاک

وتی: ئەی شێتە دیاری کردەوەت کوا؟
سەرێکی هەڵبڕی ڕووی کردە لای خوا

وتی: تۆ خۆت ئەزانی شۆڕی لەیلا
سەری واگێژ و وێژ کردم لە مەیلا

نەبیری ڕووی جیهانم بوو نە مەحشەر
خەیاڵی عەشقی لەیلا بوو سەراسەر

لەلای خوا خۆشبوو ئەم جوابە ڕەوانە
بووە ئەستێرە بۆ ئەم ئاسمانە

چ خۆشە شۆڕشی ئەو عەشقە پاکە
بەڵێ عەشقێک کە پاک بێ دیارە چاکە