بە چاوان غەمزە و ئیما مەفەرموو
بە قەتڵی عاشقی شەیدا مەفەرموو
کە من کوشتەی جەمالی تۆم عەزیزم
لە باغی جنة المأوی مەفەرموو
ئەتۆ مووسونبوڵ و ڕووئافتابی
لە حوسنی تەلعەتی لەیلا مەفەرموو
دەڵێن: فەرمووتە بمکوژێ بە ناحەق
کە تۆ سوڵتانی حوسنی وا مەفەرموو
دوو چاوم، دوور لە تۆ، تۆفانی خوێنە
لە مەوج و جۆششی دەریا مەفەرموو
دەمت وا بێنە، قیبلەم، تۆی تەبیبم
بە تەشریفی دەمی عیسا مەفەرموو
من و یەک لەحزە شەوئارام و تاقەت؟ !
لە دووری ماهی شەوئارا؟ مەفەرموو
بە خۆت بمکوژە نەک بەو چاوە بازە
بە جەللادانی بێپەروا مەفەرموو
وەفایی عاشقی ئەندامی تۆیە
شەهیدی قامەتی تووبا مەفەرموو