سوئالا من حەقیری
صەدەفەک تڤی کوتیکن
ئیرۆ کە لجزیری
حەقە کو لمەلێ کن
هیلاک ژدەربا تیری
چدەرمان هەیە لێ‌کن

سەلامێن ملیاکەتان
بێ‌حەددو بێ حەسێبن
شوبهەتێن ئاڤێ شەتان
ژمەلا لمیم وحێ‌بن
هیلاکێن ژزەحمەتان
دەرمان ژلام‌و بێ‌بن

شەربەتا لام‌و بێ‌بەیان
نادم ئەز وێ بحەیاتێ
مەعدەنا دال‌و رێ‌یان
دبارینن نەباتێ
ئیظهار تکن مەعنی‌یان
ژحوسنا بوت ولاتێ

ژنەقشێ بت ولاتان
مە سینە بوتخانەیە
تەعەییونا صیفاتان
تەجەللا دقەلبێ مەیە
عیدو شەڤێ بەراتان
ژوان‌را مە سەجدەیە

سەجدەیا شوکرێ جارەک
مەفەرضە د ویصالێ
نە پەردەبێ نە ستارەک
لبەر وەجهی هیلالێ
(احسن‌الله، تبارک)
ژسیررا وێ جەمالێ

جەمالا نورین صافە
دوەجهی تەجەللایێ
بحەرفێن خوە کەششافە
ضەمیر ددن مەعنایێ
حا، میم، عەین، سین، قافە
رەمزا وێ موعەممایێ

حێ‌یەن دهەفت حامیمان
نوقطەیان لێ پەیداکن
باڤێنە جەم دوجیمان
عیشقی ژوێ هوەیداکن
ئیسمێن‌ددو طاسیمان
دومیمان ژێ جوداکن

هەفت خوم تژینە بادە
دمەیکەدا قیدەمێ
خوما کومن مورادە
عیشقە ریهت جاما جەمێ
لەوحێ لێ‌نون‌و صادە
لەو فەیضی‌دا قەلەمێ

ساقی‌یێ خەمرا ئەزەل
نون‌و قەلەم ژی ئافراند
داریهتە لەو حا ئەووەل
رزق‌و نەصیب پێ قەدراند
ئەوبو موراد موستەهەل
نەقشی مەجاز پێ صەوراند

نەقشێ مەجاز طەلسمە
مەظهەر ژرەنگ میرئاتێ
صورەت لبال مە ئیسمە
مەعنا بتەجەللا تێ
حەرفێن دنورین جیسمە
کاف هایە دئایاتێ

کاف، ها ئیسمی کورە
طوغرایە دتەنزیلێ
جیسم وەک کوهی طورە
ئیجمالە دتەفصیلێ
جەمالە عەینی نورە
کەوکەب مە دقیندیلێ

کەوکەب دبێم بەشەرە
نورە کە مونەززەهـ تێ
چحوسنەک موصەووەرە
رەسمەک ژمن‌الله تێ
یەقین بخوە مەظهەرە
چەرخە کە صەد خەر گە تێ

خەرگە بمن حیجابە
ستار دکت جەمالێ
عەورێ رەشو نیقابە
لەبەر وەجهێ هیلالێ
پەروانە لەو دعەذابە
مەحجوبە ژشەمالێ

شەمالژی عەینی نورە
شەوقە لبەر ستار تێ
پەروانە بێ دەستورە
دچەرخێ، سەما دار تێ
حەیران سیررا غەفورە
لەوجان فیدایی یار تێ

یار حەقیقەت خالیقە
چین جان‌فیدا ڤێ کەوین
رێ دروستەو صادقە
چرەنگ شونا رێ کەوین
قەنج لەطیفەو لایقە
ئەر تڤێ باغێ کەوین

باغێ ژنور وەرەق لێ
یاردوێ دەظوهور بت
سپێدەیێ شەفەق لێ
مەظهەر ژعەینی نور بت
پورتەو ژحوسنی حەق لێ
داعەکس بێ‌قصور بت

عەکسێ ژحەق دبینین
لدۆر وەجهی مەحبوبان
لحالکی نامینین
ژسورا وان مەطلوبان
گە نالین گە دخونین
دورین ژوەصلی خوبان

فەریاد ژدەست فیراقێ
ددورین ژسولطانان
تیژن لەونی براقێ
هەیبەت‌و سورا خانان
روژ ئانی‌یە ئیشراقێ
لەو دمرین ژکۆڤانان

کۆڤانێن میهرداران
بێ حەددو بێ ئەژمارن
تیرن تێن ژهەساران
صەد جارو صەد هەزاران
خەدەنگێن دنوباران
نهین لدل دبارن

نهین لدل درشینن
تیران ژسیا گوشان
دومیرغەضەب دکشینن
لقەتلا مە مەدهوشان
ژعەین‌و قاف‌و شینن
خەدەنگێن ئەسوەد دوشان

دونونن سیاه رەنگن
بسەر لمە دەرویشان
دەربێن ئەوان خەدنگن
لقەلبێ مە دەرویشان
عاشق ژدەست بهنگن
ژداغ‌و زەجرو ئیشان

داغێن مە پڕ دکولن
خەبەر ژی نایە گۆتن
یەنگیان ضەرب لدلن
هەناو مەژێ پرصۆتن
کەماندار رەش قاتلن
گەزمە لدل بجۆتن

گەزمەیین عەین صادان
ئیشارەت رەمزو سوڕن
کشاندن گوشە بادان
مەحبوبە تیژ ئاوڕن
تیرێن دوان جەللادان
باطین لدل دفڕن

ئاورێن جوتێ بەلەک
بەرقی ژسەماواتێ
شەمسە دچەرخا فەلەک
هاتی بەنیڤ میرئاتێ
ئینسانە صورەت مەلەک
یان حورە دجەنناتێ

حوری کوتێک جەمابن
پەری هەم دڤێ گاڤێ
هەمو ژرەنگ چرابن
نیزیکی شەمس‌و طاڤێ
ژشەرما خویا نابن
ژحوسنا وێ گولباڤێ

شەرمن ژدیمی زەری
عەقرەبان دەرب لدلدان
شەمس‌و مەهو موشتەری
پێرو دموقابل دان
ئینسە بەشکلی پەری
یاحوری صفەت ویلدان

پێرو یەقین کوخالن
دعیقدا ثورەییایێ
دو رۆژو دو هیلالن
ل‌دیمێ وێ لەیلایێ
بێ وەصف‌و بێ میثالن
درەمزا شەکەر خایێ

برەمزو گفت‌و سوڕان
نەباتێ ئەو درێژن
عیشوەیێن لەعل‌و دوران
لولو شەکەر دبێژن
خەدەنگێن دئاڤران
عاشقان دێ برێژن

عاشقێن دەڤو لێوان
شاباشە ژخودێرا
سەلوا ببیهوسێڤان
بەلگن ژزیڤو زێرا
حەرامن خەوێد شێڤان
لکەسێ موحبەت ڤێرا

کەسێ کو ئێک دڤیتن
صوهتی‌یە بئولفەتی
شەڤان کوئەڤ خەڤێتن
ژبەر دەربا موحبەتی
عاشق لپەی‌وی تێتن
ژجەذب‌و ژفیرقەتی

فیراقێ تێک حیرقەتە
بەعیدە ژخەیالێ
طوطاگە بزەحمەتە
بولبول ژبەر جەمالێ
گۆیین قەت خەوناکەتە
کو دورە ژویصالێ

زەحمەت بمن ویصالە
عاشق ژبەر جەذبەیێ
لەو تێت بدەردو حالە
ژبەرقا شەعشەعەیێ
دەماهلبت شەمالە
نەظەردە پەروانەیێ

پەروانە لەو دمرت
خوەش نینە ئەو بژینێ
ضەعیفە خۆ ناگرت
تیژە بەرقا ئەڤینێ
دپەردێ ناصەبرت
دا رەت کەمالا دینێ

پەروانە لەو دصوژی
ژلەمعەیا جەذباتی
فیداکرن عومروژی
دکەشفا سوببوحاتی
کودا ژنوڤە ڤەژی
باقی بت دحەیاتی

حەیات لبامن وەصلە
دولات گەرببن لاتەک
موراد بخۆ هەر ئەصلە
تێکدا ببن صیفاتەک
ژهەڤ ئێک نەبن فەصلە
واحید بمینت ذاتەک

واحید ذاتە کە فەردە
تەجەللا دا صیفاتان
بعەینی دل نەظەر دە
لجوملە تەعیینا تان
تەوەهوم بویە پەردە
بئیسمی بت‌و لاتان

لاتژی صورەتەک حەقە
ژئەسمائێت حەقانی
لبال من موحەققەقە
دنیڤ کەشفا سوبحانی
لاهوتە هەر موطلەقە
دنا سوتا ئینسانی

ئینسان بمن ناسوتە
گەوهەر دنیڤ صەدەفێ
ژعیلما جەبەروتە
شەمس هاتی‌یە شەرەفێ
(تنزڵ) ژلاهوتە
مەحبوبە جام دکەفێ

کەفا کو کوزو کاس‌تێ
نازک‌و سپی زەندن
قەدەحا مەیا خاص‌تێ
بنێرن طالب چەندن
ڤەخون ژدەستی راستێ
بمەدحان مەحبوب خوەندن

وەصف و مەدحێن مەحبوبان
لداغێت کو حەیاتن
قوتن ژبۆ قلوبان
گولاڤ، قەندو نەباتن
ژنەغما مەدحێن خوبان
عاشق بجەذبە هاتن

عاشق بوەصف‌و مەدحان
دفیراقێ دصەبری
نەسیم بێت ژوان تەرحان
بولبول نەشێ خوەبگری
خون‌دێ دەربت ژجەرحان
دی بداغێن کول بمری

بولبولێن وێ گولشەنێ
ژئەزەل ئەو دبێژن
تا ئەبەد ژمەعدەنێ
گەوهەران دا برێژن
حەرفەک ژوەصفان تنێ
عالەم تێک نابرێژن

جەماکن تێک عالەمێ
حەمی‌یان بئوستاد کن
حەرف ژلەوحێ قیدەمێ
بەشەرح‌و بسەواد کن
نائیتە بەر قەلەمێ
بەحران ئەر بمیداد کن

نەسرین‌و گول طەبەقەک
سەحەر ژباغێ گولان
ژنەستەرەن وەرەقەک
بەسە مە صاحیب دلان
عورفەخواهی سەبەقەک
چێتر ژصەد سجلان

ئەحسەن ژنو سەبەقان
قەلەم ژقەندو نەباتێ
لسەر صەفحا وەرەقان
دی رژی ئاوا حەیاتێ
دەس بدەس ژێ طەبەقان
مەلەک دبن جەنناتێ

نڤیسا تە عەنبەرن
زوبادو میسک پێژن
چشاخێ نەیشەکەرن
قەندو نەبات درێژن
نوطقاتە خوە گەوهەرن
صەدبار گوهەر هاڤێژن

گولم ددەستی خاران
بیسمێ «محمد» ناڤم
بولبولم دگولزاران
ژعیشقێ لەو زەرباڤم
دزومرەیا میهر داران
تو رۆژی ئەز هەطاڤم

دورم ژگولێ بخوناڤە
لەوزەر شوبهەتێ بیهم
سوسن عەرەق طلاڤە
دفیرقەتێ دبرژەهم
لبال خودان دلاڤە
تو هەطاقی ئەز سێهم

برینداری عیشقێ مە
دورم ژسیها بێهان
زانن مەدداحی کێمە
دهەزارو یەک‌و سێهان
ثەناخوانی «مەلێ» مە
لە هەمو عەردو جێهان

هیندی کو دگازەهم
دکێشم صەبرو حیرێ
شوبهەتی چەنگ‌و ژەهم
هیلاک ژدەربا تیرێ
ثەناخوانی فەقەهم
ئیرۆ کە دجزیرێ