بریا زانیبات چاوی تۆ
ئەستێرەن بۆ شەوەکانم
بەڵام شەوانی بێ تۆیی
گوشار دێنن بۆ نێو گیانم

بریا زانیبات هەناسەت
فێنک بون وەکوو شنەبا
بەڵام لەوکاتەی تۆم نیە
وەک تۆفانی بێ ئامانم

بریا زانیبات خەیاڵت
وەک خە ونێکی شیرن وایە
لە تەعبیری ئەو خەونە دا
نەماو و ورد و وێرانم

نە مانگەشەو، نە کاتی خەو
نە دەستی گەرمی ڕۆژەکان
نە قژی ئاڵۆزی شۆرە بی
کم ناکەن لە غەمەکانم

وەک تاقە دارەکەی حەوشە
هەست بە دڵتەنگی زۆر دەکەم
وەک باڵەندێکی باڵ قرتاو
ئەسیری بەند و زیندانم

من وەک پێنووسی شکاوی
شاعیرێکی عاشقم
تۆش وەک لاپەڕێکی دڕاو
لە دەفتەری شێعرە کانم

وەک گەڵای زەردی پاییزم
لە ژێر لاقی ڕێبوارەکان
وەک گولێکی بێ دەسەڵات
هەڵقەندراو و بێ گیانم

بە ڕۆژ شەوم بە شەو ونم
بە ئەستیرە دەڵیم چرا
بە مانگیش دەڵیم پەپولە،
نازانم بوای لێهات ژیانم

نە شێتم، نە سەر لێ شێواو
نە گێژم و نە سەرسەری
کاتێک هەناسەیێک نەبێت
دایمە خەریکی خنکانم

کاتێک هەنگاو لە دوات نایەن
تەمەن لێت دەبێتە دوژمن
لە سوچێکی دادەنیشم
باوەش دەکەم ئەژنۆکانم

چنگ دەکەم بە تاڵی قژم دا
وەک مەجنونێکی بێ لەیلا
زۆر بە هێواشی دەنگم دێت
داخراوە زار و زمانم

خەیاڵی تۆ قەت ون ناکەم
با هەر پێم بڵێن شێتی
با هەر سوک بم لەبەر چاوان
بەڵام ئارامە ویژدانم

بریا زانیبات دەڵێم چی
و چی لە نێو دڵم دایە
بریا زانیبات تۆ نەبی
نامەوێ تەنانەت گیانم