من و تۆ جیهانێکین
ئاسمانی تۆ، حەرزەکەی من
من و تۆ رۆڵەی هەور،
بارانی تۆ، تەرزەکەی من

من و تۆ باغێکی خۆش،
میوەکەی تۆ، دارەکەی من
من و تۆ مۆسیقایێک
سازەکەی تۆ، تارەکەی من

من و تۆ وەکوو شارین
شەقامی تۆ، خانووەکەی من
من و تو چێشتێکی خۆش
ئاوەکەی تۆ، دانووەکەی من

من و تۆ شاڵی چندراو
کامواکەی تۆ، شیشەکەی من
من و تۆ گوڵێکی بون خۆش
پەلکەکەی تۆ، ڕیشەکەی من

من و تۆ کتێبی شێعرین
کێشەکەی تۆ، پێڕەکەی من
من و تۆ تام بۆ زارین
شیرنەکەی تۆ، سوێرەکەی من

من و تۆ نیشتیمانین
مافەکەی تۆ، خاکەکەی من
من و تۆ هەنگی شیرن
شیلەکەی تۆ ماکەکەی من

من و تۆ داستانێکین
ئەوەڵی تۆ، کۆتایی من
من و تۆ شاعیرێکین
هێمنی تۆ، تەنیایی من