سەید مەلا مامەد سلێمان کوڕ سەید ماموود خانەقاهی ناسیاێ وە سەیدی هەورامی (صەیدی هەورامی) (١٧٨٤ زایینی لە خانەقا لە پاوە - ١٨٤٨ لە کرماشان) ھەڵوەسوان کورد خەڵق هەورامان بۊە ک ھەڵوەسەیلێگ وە زوان کوردی ھەورامی، فارسی و عەرەبی وەتیە.
بەناوی خوای گەورەو ميهرەبان شيعرو شاعيرەكانمان له ڕۆژنامەی «ژين»ی ژماره «١٣٨١»ی ڕۆژی ١٣/٢/١٩٥٨ی زاينيدا له ژێر ناوی «شيعرو شاعيرەكانمان»ا وا نووسرابوو:
«صەيدی» كه به «صەيدی هەورامی» بەناوبانگه له دوا ڕۆژەكانی پازدەهەمی ميلاديدا واته «٤٥٨» ساڵ لەمەو پێش، كۆچی دوايی كردووه، وه له شاری «ڕەزاو»دا نێژراوه. «صەيدی» بێجگه لەوەی كه زاناو شاعيرێكی پايەبەرز بووه، له هونەری پزيشكيشدا دەست درێژ بووه، وەكوو ئەڵێن: له گوڵی «وەنەوشه»و هەندێ گژوگيای كوێستان شەربەتێكی دروست كردووەو بەوه نەخۆشی «ڕەشه گرانەتا»ی چاك كردووەتەوه. ئەم هەڵبەستەی خوارەوه نموونەی شيعرەكانيەتی:
١ـ خەم خەڵاتمەن، خەم خەڵاتمەن خەمكێش‏و خەمناك، خەم خەڵاتمەن
٢ـ بای موراد پەی دەرد موشكڵاتمەن دەردی داخی دۆست دور وڵاتمەن
٣ـ حەسرەت جه لام جەم، پەی دووری يارم خاتر پوڕ جه دەرد، دڵ پوڕ ئازارم
٤ـ گرفتاری دەرد جای نەڕەستەنان حەسرەت مەندی‏يەن، ئاوات واستەنان
٥ـ تاقەت لێم بڕيان، نەمەندەن تابم هوون مەشۆ جه جەرگ، كزەی كەبابم

داخەكەم «ژين» ناوی نووسەری وتارەكەو ئەو سەرچاوەيه كه ئەو شتانەی لێ وەرگرتوه نەی‏نووسيوه. بەلای منەوه هەڵه زۆره له ساڵی ژيانيا، بەتايبەتی كه به تەواوی روون بوەتەوه «صەيدی» له زەمانی شێخ «عوسمان»ی «تەوێڵه»دا بووه، وه تا ساڵی١٢٦٥ی كۆچی ژياوه، خانوەكەشی له شاری «هەورامان»ی «تەخت» له كوردستانی ئێرانايەو تا ئێستاش هەر ماوه. جا بۆ زانين لەم رووەوه با سەيری مێژوی ژيانی «صەيدی» بكەين:
*** (صەيدی) دەربارەی «صەيدی»و ژيانی، وه بۆ كۆكردنەوەی هۆنراوەكانی ماوەی ٢٧ ساڵ زياتر به هەموو جۆرێك خەريكم؛ ئەوەی كه بۆم ڕوون بووەتەوه به خوێندنەوەی ئەو پەرتووك‏و بەيازو كەشكۆڵی شاعيرانەی كه لەلامن، وه به پرسيار كردن له زانايان‏و پيران‏و شارەزايان، ئەوەيه كه: «صەيدی» شاعيرێكی بەرزی «هەورامان»ه؛ له ساڵی ١١٩٩ی كۆچی تا ساڵی ١٢٦٥ی كۆچی ژياوه. وه زياتر له ١٥٠٠ هۆنراوەی هەيه، زۆريان به شێوەی هەورامی كۆنی «هەورامان»ی «تەخت»ەو بەعزێ له هۆنراوەكانی به تێهەڵكێشی «فارسی»و «هەورامی»يه، وه له يەك دوو هۆنراوەشا تێهەڵكێشی «هەورامی»و «عەرەبی»شی هەيه. وەكوو:
١ـ ئەر سەراسەر زێڵو من گێڵيش پۆنه «غَيْرُ حُبِّك فِي فُؤادي لَيْسَ شَی‏ء»
٢ـ شێخ‌‌‌و پير، مەڵڵاو مير گرد عاشقۆ «ما عَلَيْهِمْ لَوْمَةٌ اِلاّ عَلَی»
واته: ١ـ ئەگەر سەراسەر دڵی من بپشكنی، جگه له خۆشەويستی تۆ هيچی‏تری تيا نيه.
٢ـ شێخ‌‌و پيرو مەلاو مير هەمويان عاشقن، بۆ ئەوان هيچ لۆمەو شتێ نيه، تەنيا بۆ من هەيه لۆمەم ئەكەن.

«صەيدی» له تێهەڵكێشی «فارسی»و «هەورامی»يا دەستێكی باڵای بووه. بۆ نموونەی ئەمەش ئەم چەند هۆنراوەيه ئەنووسين:
١ـ ته هەر زۆن ماچێوەت مێژۆ گيۆنێ «در اين سودا نباشد چون و چندِ»
٢ـ ڕيۆنێ مونگەڵه، ديمێ بێ نەوەردێ «خدايت يار باد از هر گَزندِ»
مانای ئەم دوو هۆنراوەش به شێوەی «سۆرانی» ئەمەيه:
١ـ تۆ ماچێكت هەرزانه به گيانێ، لەم شتەدا مەعامەلەو سەوداو زيادو كەم نيه.
٢ـ «ڕێحان»ی ڕوومەت «مانگ»ی بێ وێنه، يەزدان بت‏پارێزێ له هەموو ناخۆشی‏و پەژارەيەك. «ڕێحان» ناوی يارەكەيەتی.

شيعرەكانی «صەيدی» هەموويان باسی عيشق‏و دڵداری‏و جوانی ديمەنی شاخ‏و باخەكانی هەورامانه، له كاتی سەيران‏و شادی‏يا؛ وه له هەر چوار وەرزی ساڵا بەتايبەتی له بەهاران‏و هاوينانا، وه كاتێ كەژو كێو به گوڵو گوڵاڵه ئەڕازێنەوه. «صەيدی» به هۆنراوەكانيا وا دەرئەكەوێ حەزی له سێ كچی جوانی «هەورامان» كردبێ. يەكەميا كچی «بارام» ناوێك بووه له «ژيوار» كه دێيێكه له هەورامان، وه ناوی ئەم كچەش «نيشات» بووه. يەكێتريان ناوی «شيرين» بووه، كه له زۆر هۆنراوەيا ناوی بردووه. سێيەميشيان ناوی «ڕێحان» بووه كه له هۆنراوەكانيا به «ڕيۆن» ناوی ئەبا. له «هەورامانی تەخت» ئێستاش به «ڕێحان» «ڕيۆن» ئەڵێن. له هۆنراوەيەكی تريا باسی «وەنەوش» ناوێك ئەكات، ڕەنگه حەزی لەويش كردبێ. عەشق‏و جوانی ئەم كچانەو ديمەنه جوانەكانی شاخ‏و باخاتی هەورامان له چوار وەرزی ساڵا، له كاتی بەفرو باران‏و بەهارو سەيران‏و چوونه سەر پيرو شاخی «عەوداڵان»و «كۆساڵان»و كاتی دەرهاتنی گوڵو گوڵاڵه، «چنوور»و «سووره هەراڵه»، هاژه هاژی بەفراوو قاسپه قاسپی «كەو»و ئاسمانی شين‏و كانياوی ڕوون‏و دەنگی گۆرانی‏و «بلوێر»ی شوان لەسەر لوتكەی سەرشاخان‏و ديمەنی بێ وێنەی «كوردستان» له كاتی ئێوارەو بەيانيان، ئەمانه هەموويان «صەيدی»يان كردووه به شاعيرێك كه هەرگيز لەبير نەچێتەوه. بەتايبەتی لای ئەوانەی كه «هەورامی» ئەزانن وه حەز به خوێندنەوەی هۆنراوه جوانەكانی ئەكەن، كه لەسەر شێوەی هەورامی كۆنه. زۆر جار نموونەی شيعری ئەم شاعيرەم له گۆڤاری «گەلاوێژ»و لاپەڕەكانی «ژين»دا بڵاو كردووەتەوه، وه له بابەت ژيانی ئەم شاعيرەوه شتم نووسيوه. بەعزێ له خوێندەواران‏و شارەزايانی كوردستانی «ئێران» ئەڵێن كه: «صەيدی» دووان بوون، يەكێكيان زۆر كۆنه، ئەوی‏تريشيان تازەيه. بەڵگەشيان بۆ ئەمه تەنيا ئەوەيه: كه هۆنراوەكانی «صەيدی» بەعزێكيان به شێوەی هەورامی كۆنه، باقيشيان بەو شێوه كۆنه نيه. بەڵام من وائەزانم كه «صەيدی» هەر يەكێكه، توانيويه به هەردو شێوەكه هۆنراوەی جوان‏و ڕێك‏و پێك دانێت. ئەگەر دووان بن ماوەی بەينی ژيانيان ٥٠٠ ساڵێك ببێ. هەرچۆنێ بێ «صەيدی» شاعير له شاری «هەورامانی تەخت» دانيشتوه، خانوەكەشی تا ئێسته ماوه، به پرسيارو بيستن‏و به خوێندنەوەی:
١ـ پەرتووكه دەس‏نووسەكەی مەلا «حامدی» كوڕی مەلا «عەلی» «بێسارانی» كه له ٧٠٠ لاپەڕه زياتره، وه هێشتا لەچاپ نەدراوه، وه ناوی «رياض المُشتاقين»ه.
٢ـ به سەير كردنی دەفتەرو كەشكۆڵی شيعری مامم شێخ «حسام الدّين» كوڕی شێخ «بَهاءَ الدّين». قدس‏سرهم
٣ـ به خوێندنەوەو پيا چوونەوەی دەفتەری شيعرو بەيازی مامم شێخ «صادق» كوڕی شێخ «بَهاء الدّين». قدس‏سرهم
٤ـ به سەير كردنی دەفتەری شيعری «صەيدی» كه مەلا «عبد الكريم مُدرِّس» نووسيبوويەوه له «بەغدا» پێی دام لەگەڵ دەفتەره دەس‏نووسەكەی «محەممەد»ی مەلا «ساحێب» كه شيعری «صەيدی» تيا نووسيوەتەوه بۆ مەلا «عبد الكەريم»ی ناردووه. «خوا پايەی بەرزتر بكاتەوه»
٥ـ به خوێندنەوەی دەفتەری شيعرەكانی سەييد «نور الدّين» كه خزمی «صەيدی»يەو ئێستا له قەزای «هەڵەبجه»يه، هۆنراوەی زۆری «صەيدی» تيايه.
٦ـ به سەير كردن‏و پياچوونەوەی ئەو نامانه كه خزمانم له هەموو لايەكەوه بۆيان نووسيوم، وه ژيان‏و هۆنراوەی «صەيدی»يان بۆ ناردوم.
به خوێندنەوەی ئەم هەموو سەرچاوانه، وه پرسيار كردن له ماوەی ٢٧ ساڵدا، بۆم دەركەوت كه «صەيدی» ناوی مەلا «محەممەد سڵێمان» كوڕی حاجی سەييد «مەحمود»ەو له دێی «خانەگا»له دايك بووه. لەلای زۆر مەلای «هەورامان»و بناری «شارەزوور» خوێندوويەتی. وەكوو بۆم ڕوون بووەتەوه: دواپلەی خوێندنی «صەيدی» لای مەلا «جەلال»ی «خورماڵ»ی بووه، وه لەلای ئەو ئيجازەی عيلمی وەرگرتووه. «صەيدی» پاش تەواو كردنی خوێندن ئەچێته هەورامان، وه له شاری «هەورامانی تەخت» جێگير ئەبێ، ژن دێنێو به مەلايەتی‏و دەرس وتنەوەو ئيش‏و كاری باخەوه خەريك ئەبێ. وەكوو بيستوومەو له گۆڤاری «برايەتی»دا له ژماره ٢ی ساڵی ١ی «تەمووز»ی ١٩٧٠دا نووسيومه: «صەيدی» دەرسيشی به شێخ «عوسمان»ی «تەوێڵه» وتووه، بيستنەكەشم له مامم شێخ «صادق» وه «ئەحمەد هەورامی» بووه. «صەيدی» له تەمەنی ٦٠ ساڵی‏يا ئەبێ به خەليفەی شێخ «عوسمان»، وه له وەڵامی نامەيەكی شێخ «عوسمان»دا هەڵبەستێك به ناوی «ياشێخ سەنعانم...» دائەنێو بۆ شێخی ئەنێرێتەوه. ئەم هۆنراوه پاش ئەوه بووه كه موريدو سۆفی‏يەكانی شێخ له هەورامانەوه دێن بۆ «تەوێڵه»، وه به شێخ ئەڵێن: قوربان «صەيدی» بۆ خەليفەيەتی دەس نادات، هەر خەريكه شيعر به ژنانا هەڵ ئەدات. هەڵبەستی «ياشێخ سەنعانم...» بريتی‏يه له ١٤ هۆنراوەی جوان، بۆ نموونه لێرەدا ئەم دوو هۆنراوەيان ئەنووسين:
١ـ گشت جه من فێشتەر حاڵشان فەنان داخم هەر ئێدەن، هەر پەی من مەنان
٢ـ ئەر عاشق نەبان يەكسەر مەڵڵاو شێخ فتوا بۆ «صەيدی» سەربڕان به تێخ
مانای ئەم دوو هۆنراوەش به سۆرانی ئەمەيه:
١ـ هەموويان له من زياتر حاڵيان بەرباده له عەشقا، داخم هەر ئەوەسه كه هەر لۆمەی من ئەكەن.
٢ـ ئەگەر مەلاو شێخەكان عاشق نەبن، فتوا بێ «صەيدی»ش سەربڕن.

«صەيدی» وەك وتمان ناوی مەلا «محەممەد سڵێمان»ه نازناوی «صەيدی»يه به «صاد» نەك به «سين» وەك له بەعزێ پەرتووك‏و گۆڤارا نووسراوه. وه «صەيدی» له «صَيد»ەوه هاتووه به مانا ڕاو. وەكوو خۆی لەم هۆنراوەيا وتوويەتی: عەرزه داشت بەندەی دڵمەندو ڕەنجوور «صەيد»ی دامی عەشق، به «صەيدی» مەشهوور واته: بەندەی دڵمەندو دڵ گيرو دڵ زامار عەرزی هەيه، ئەو بەندەش كێيه؟ ! «صەيدی»يه كه بووه به داوی عەشقەوه. به «صەيدی» ناوبانگی دەركردووه. وه له هۆنراوەيەكی‏ترا به فارسی ئەڵێت: الهی صيديم كُن، صَيد جنّت اگرچه بار عصيان صد هزارم «صەيدی» له هەڵبەستێكدا كه تێهەڵكێشی «فارسی»و «هەورامی»يه به ناوی «جڤۆنيم شڕه» وه ١٣ هۆنراوەی نووسيوه، ئەم ٥ هۆنراوەی خوارەوه بەشێكه لەو هەڵبەسته:
١ـ جڤۆنيم شڕ، مەزۆن لاو كێ بەروو داد «خلل اندر اساس عُمر اُفتاد»
٢ـ چوار پۆزێم ژمۆرێ، ساڵو ئەمريم «گهی با شادی و گاهی به ناشاد»
٣ـ «گر از اِحسان و طاعتم تو پُرسی؟» سەروو پووشێ نه ئێدەم هەن، نهۆ ئاد
٤ـ بەرەم ئەمرێ فراوان پێسه زۆنه «ازين شصته رسيدم تا به هفتاد»
٥ـ خەڕه پی دۆنيه مايەی بێ وەفانه «كه هيچست و ندارد هيچ بُنياد»
واته: ١ـ جوانيم كەلوو كۆم‏و شڕ بووه، نازانم داد بۆلای كێ ببەم، بناغەی عومرو تەمەنم لەق‏و لۆق بووه، بەرەو خراپی ئەڕوات.
٢ـ چوار پانزەييم له تەمەنی خۆم ژمارد، بەعزێ وەخت به خۆشی، وه هێندێ جار به ناخۆشی ژيانم ڕابوارد تا تەمەنی ٦٠ ساڵی.
٣ـ ئەگەر هەواڵی چاكەو خراپەم ئەپرسی؟ ، بەقەد سەره پووشێك نه ئەمم هەيه، نه ئەو.
٤ـ ئەگەر تەمەنم زۆر درێژتر بێ وا بزانه ده ساڵی‏تر ژيام‏و گەييمه حەفتا.
٥ـ بەم دنيايه كه بێ وەفايه دەس‏خەڕۆ مەبه، چونكه هيچ‏و پووچ‏و بێ بناغەيه. لەم هۆنراوانەدا بۆمان ڕوون ئەبێتەوه كه «صەيدی» ٦٠ ساڵ ژيانی به خۆشی‏و ناخۆشی ڕابواردووه. ئەم هەڵبەستەی له كاتێكا وتووه كه هێشتا نەبووه به خەليفەی شێخ «عوسمان»ی «تەوێڵه»؛ بەڵگەشم بۆ ئەمه ناتەواوی ئەم هەڵبەستەيه كه ئەڵێت:
١ـ فره گێڵوو حەكيمێ يۆزو پەی وێم «كه صادق باشد اندر فنّ اِرشاد»
٢ـ حەكيمێو هەن پێسەو «لوقمۆن»، ملوو لاش «كه پيش او مُريدانَند و زُهّاد»
٣ـ ملوو، بەڵكم به من كێشۆ چلێوه «شود پاك اين تَن مُردار فَساد»
٤ـ ئەگەر ته پيرو، پيرت بۆ تكاكار «شوی «صيدی» ز نار دوزخ آزاد»
مەعنای ئەم هۆنراوانەش به «سۆرانی» بەم جۆرەيه:
١ـ زۆر ئەگەڕێم تا پزشكێكی دينی ئەدۆزمەوه بۆ خۆم كه باش‏و ڕاست‏گۆ بێت له هونەری ئيڕشادا، تا ڕێگای خوا پەرەستی‏و دينداريم نيشان بدات.
٢ـ پزشكێكی دينی هەيه وەكوو «لوقمان» وايه ئەچمه لای، كه ئەو پزشكه سۆفی‏و موريدی دينداری زۆره.
٣ـ ئەڕۆم، بەڵكو به من «چله»يێك بكێشێ، تا ئەم لەشەی مردارەوه بووەم پاك بێتەوه. «چله» ئەوەيه كه چل ڕۆژ لەسەر يەك هەر خەريكی عيبادەت‏و ڕۆژوو بن.
٤ـ «صەيدی» تۆ خۆت پيرو، پيرێكی دينيشت ببێ به تكاكار، وا له ڕۆژی قيامەتا له ئاگری دۆزەخ ڕزگار ئەبيت. پاش ئەم هەڵبەسته چووەته خزمەت شێخ «عوسمان»ی «تەوێڵه»، وه بووه به خەليفەی، چونكه بەم هۆنراوەدا وا دەرئەكەوێ پاش تەمەنی ٦٠ ساڵی ئەمجا ئەڵێ: ئەڕۆم ئەگەڕێم تا پيرێكی دينيم باش پەيا ئەكەم. وه ئەوەی كه پێويسته بيڵێم: له زەمانی «صەيدی»دا له هەورامانا جگه له شێخ «عوسمان» شێخی‏تر نەبووه، تا «صەيدی» بچێته لای. وه لەلای هەموو پيرو شارەزايانيش كه «صەيدی» خەليفەی شێخ عوسمان بووەو هيچ گومانی تيا نيه كه «صەيدی» هۆنراوەی «يا شێخ سەنعانم»ی بۆ شێخ عوسمانی تەوێڵه وتووه. به شكات كردنی وشكه سۆفی‏يەكان، دەرئەكەوێ كه ئەبێ «صەيدی» ماوەيێك به خەليفەيەتی شێخ «عوسمان» له هەورامانا مابێتەوه. يانێ: تا تەمەنی ٦٥، يا ٦٦ ساڵی. يانێ: ٥ ـ ٦ ساڵێ خەليفه بووه. ئەوەی كه شايانی باسه: «صەيدی» له ساڵی ١٢٧٤ی كۆچيدا له ژيانا نەبووەو بەر لەو ساڵانه وەفاتی كردووه. چونكه مەلا «حامد»ی كوڕی مەلا «عەلی» بێسارانی له پەرتووكه دەس‏نووسەكەيا له لاپەڕەی ٣٦٣وه تا لاپەڕەی ٣٧٠ باس‏و ناوی خەليفەكانی شێخ عوسمانی نووسيوەو ئەڵێت: شێخ «عوسمان» زياتر له ٢٠٠ خەليفەی بوون، لەمانه كه خوێندەوارن‏و وان له ژيانا ناويان ئەنووسم، له كاتی نووسينی ئەم پەرتووكەدا كه هاوكاتی ساڵی ١٢٧٤ی كۆچی‏يه. خاوەنی كتێبی «رياض المُشتاقين» ناوی ٨٠ مەلاو خوێندەواری نووسيوه كه خەليفەی شێخ عوسمان بوون، لەگەڵ ناوی چەند مەلاو خوێندەوارێكی‏تر كه ئەوانيش خەليفەی شێخ عوسمان بوون، وه پێش مردنيان مەلا حامدی كوڕی مەلا عەلی بێسارانی خۆی چاوی پێ كەوتوون. له ناو ئەو هەموو ناوانەدا ناوی «صەيدی» يا مەلا «محەممەد سڵێمان»ی تيا نيه. ئەمه وامان بۆ دەرئەخات: ئەبێ «صەيدی» پێش ساڵی ١٢٧٤ی كۆچی وەفاتی كردبێ به ده ساڵێك يا كەمتر. بەمەدا ئەتوانين ڕوونی بكەينەوەو بڵێين كه: ئەبێ «صەيدی» لەبەينی ساڵی ١٢٠٠ـ ١٢٦٥ی كۆچيدا ژيابێ. ئەمه ئەگەر تەمەنی به ٦٥ ساڵی دانێين. خۆ ئەگەر ٦٦ ساڵ ژيابێ وا ئەبێ لەبەينی ساڵی ١١٩٩ـ ١٢٦٥ی كۆچيدا بووبێت. وه بەلای منەوه ئەمه نزيكترين ماوەيه كه دەس‏نيشان بكرێت بۆ ماوەی ژيانی «صەيدی» ئەو خانووەی كه «صەيدی» شاعيری تيا بووه له هەورامانی تەخت تا ئێستاش ماوه، بەمەشا بۆمان دەرئەكەوێ كه «صەيدی» نابێ زۆر كۆن بێت. «صەيدی» پاش خۆی دوو كوڕی لێ بەجێ ماوه، ناويان: مەلا «شەريف» وه مەلا «مەحمود»ه، نەوەی ئەمانيش له هەورامانی تەختا ئەژين. هۆنراوەكانی «صەيدی» وەك وتمان زۆريان باسی زوڵف‏و كوڵم‏و چاوو برۆو ليمۆی جوانانه. هيندێكيشيان هەڵبەستی ئايينی‏و باسی خواو پێغەمبەره. له ديوانەكەشيا هەڵبەستی وای تيايه كه باسی ديمەنه جوانەكانی «كوردستان»ه له كاتی «بەهار»و «پاييز»و «زستان»و «هاوين»ا. ئەوەی كه شايانی باسه: تا «مايس»ی ١٩٦٣ی زايينی زياتر له ١٤٥٠ هۆنراوەی «صەيدی»م كۆ كردەوه، بەڵام داخەكەم هەروەكوو له گۆڤاری «برايەتی» ژماره ٢ی ساڵی ١ی «تەمووز»ی ٩٧٠دا نووسيبووم، ئەو ديوانی «صەيدی»يه لەگەڵ ٨٠٠ پارچه هەڵبەستی خۆما كه هێشتا بڵاو نەكرابوونەوه، وه لەگەڵ زۆر كتێبی كوردی ترا هەموويان كران به خۆراكی ئاگر. پاش ئەوه دووباره كەوتمەوه بيری كۆ كردنەوەی «صەيدی»، وه له ماوەی ٧ ساڵا توانيم دووباره ١٠٠٠ شيعری‏تری ئەم شاعيره بەناوبانگه كۆ كەمەوه، وەكوو لەم پەرتووكەدا ئەبينن ١٠٣٤ هۆنراوەم نووسيوەتەوه، وه توانيم مانای هەموو هۆنراوەكانيش به شێوەی «سۆرانی» شی كەمەوەو وشه گرانەكانی لێك بدەمەوه بەو جۆره كه مامۆستا مەلا «عبد لكەريم» ديوانی «مەولەوی» پێ لەچاپ داوەو بڵاوی كردووەتەوه. مەبەستيشم لەمه ئەوەيه كه ئەوانەی «هەورامی» نازانن به سەير كردنی ئەو وشانەو ماناكانيان‏و شی كردنەوەی هۆنراوەكان، كەمێك شارەزايی له زمانی هەوراميدا پەيا كەن، وه به خوێندنەوەی شيعره جوانەكانی «صەيدی» لەززەت وەرگرن، وه تێ بگەن كه «هەورامان» شاعيری وای بووه. هيوادارم منيش بەم ئيشه بچووكه توانيبێتم خزمەتی گەل‏و نيشتمانه خۆشەويستەكەم كردبێ. ئيتر دەس له دەس‏و هێز له «يەزدان» *** سلێمانی: «كانوون»ی دووەمی ١٩٧١ی زايينی كاردۆخی