شیعری ئایدیا، عەبدوڵڵا پەشێو

چەند ڕۆژێکە،
ئیدیای شیعرێ،
وەک مەلێکی سپیی تیژباڵ^١،
لێم ناگەڕێ و لێم ناگەڕێ
هەرچەند خۆمی لێ ون دەکەم،
لە پڕێکا
هەوری بیرم دەقڵیشێنێ و تێدەپەڕێ

هەدا نادەم! ^٢
نازانم کەی
ئەو باڵندە کێویلەیە هەڵدەنیشێ؟
کەی ڕام دەبێ؟
کەی لێم ڕادێ؟
دەڵێی ژنە!
دوای دەکەوم، بۆم ناگیرێ
دەکشێمەوە، بە دوامدا دێ

١. تیژباڵ: مەلی خێرا لە فڕینا
٢. هەدادان: ئۆقرەگرتن، دابین بوون، ئارام گرتن، داسەکنان