(١)
جووتێک پێڵاوی ڕەشم لە پێیە؛
پینەدار، هەرزان، گەمار، سووک، گڵاو
هەزار جار ئەم پێ و ئەو پێ پێکراو
چەند جاری کەوا سەرنجیان دەدەم،
بە دەست خۆم نییە، لمۆزی پێڵاو
قەپۆزی هەندێ
سەرکردەی کوردم دێنێتە بەرچاو

(٢)
لە غەیبەوە هاتوومەوە
هاتوومەوە پێتان بڵێم؛
ئەم وڵاتە
قەت بێ خرمەخرمی ناڵ و
زرمەزرمی پۆستاڵ نابێ
تاکوو ئێوە ئەو پردە بن... .
هەر دیل بوون و هەر دیل دەبن،
تا چەرچی و دز سەرکردە بن!

(٣)
نەگبەتی بەرۆکی گرتووین
لەملاوە دێ
گێژەڵووکەی لمی ئاران
لەولاوە دێ
تەرزه و برووسک، بەفر و باران

دانەوەختێک باڕۆڤەیە... ڕەشەبایە
دانەوەختێک گەرداوی تەڕی دەریایە
کەچی ئێمەی سڕ هەتا ناخ
ئێمەی ڕووتتر لە تیشەشاخ
خوێنی یەکتر دەخۆینەوە
لەسەر کورتی و درێژی مووی کلکی وڵاخ