نیگارا ڕوویی ڕەحمێ گەر لەسەر ئەو عەهد و پەیمانی
دڵی بێچارەکەم مەعلوولی تۆیە چی لە لوقمانی
وەرە بەشقی خودا یا بیکوژە یا بیکە دەرمانی
فیدات بێ ئەو ڕوحی شیرین هەتاکەی دڵ پەرێشانی
بەڵایێ وات بەسەر هێنام چ کەس دەرمانی نازانی

لە بێ عەهد و وەفایی بوو وەها مەنفووری تۆیە دڵ
لە ڕەسمی پڕ جەفایی بوو کەوا مەهجووری تۆیە دڵ
خودا هەڵناگرێ جانا پەشێوی دووری تۆیە دڵ
زەمانێکە لە گۆشەی بێ‌کەسی ڕەنجووری تۆیە دڵ
حەبیبم کەعبە کەچ نابێ ئەگەر خۆت بێیە سەردانی

لە نەقشی عارزت حەیرانە دائیم مانییێ چینی
لەسەر ڕوو پەردە بەس لادە هەموو شەخسێ کە نەتبینی
لە دڵ سەبر و لە تەن تاقەت، لە سەریا عەقڵ نامێنی
کەسێ لەم عەسرە نەیدیوە بەشەر وەک تۆ بە شیرینی
تەحەیور ما لە تەسویرت ئەگەر نەقاش ئەگەر (مانی)

لە فەریادم وەرە ئەی گیانی شیرین ڕۆژت ئەوڕۆیە
دڵم مەشکێنە بەستەی زوڵف و خەستەی پەرچەمی تۆیە
لە تفڵی عەبدی تۆم ئێستێش لە بۆ تۆم شین و ڕۆڕۆیە
لە منداڵێوە تەوقی بەندەگی تۆم هەر لە ئەستۆیە
وەکوو قومری دەناڵێنم، عەزیزان دڵبەرم کانی؟

لە قەلبم تا ڕەمەق ماوە وەرە ئەی جانی شیرینم
تەڕەحوم کە، بە سەرما ڕابرە، تێ فکرە ناڵینم
لە نەزعا فائیدەی نادا دوعای تەسکین و ئامینم
وەرە سەر چاوەیی چاوم، بنۆڕە سەیلى خوێنینم
قیاسى ناکرێ ئەسلا لە حەوز و جۆگە وو کانى

لەدەردی دووری یاران نەما ئارام و تەسکینم
وەرن ساتێ لە ڕێگەی خوا بپرسن گریە وو شینم
نەجاتیم دەن لە ئەم دەردە بە مردن یا نە خۆ ژینم
بڵێنە شۆخەکەم تاکەی لە دووری هەر بناڵینم
چییە جارێ وەکوو عارەب کە دەستم گاتە دامانی

لە نێو تابووری غەم وا هات لە تەعلیماتی مەشقی تۆ
چ ترسی قەید و زنجیرە لە ئەستۆ دایە تەوقی تۆ
بە موژدەی وەسڵی پابۆسیت حەیا وا چوو لە شەوقی تۆ
هەتا ئێستێکە مەشهوور بوو بە بەدنامى لە عەشقى تۆ
چ باکى لۆمەیی غەیرە لەمەولا (سافى هیرانى)