یادێ وەکو شووشەی شکاو
لە دڵما ئەجوڵێ نەرم
بریسکەی خوێندێکی ڕژاو
ئەدا بەگیان کسپەی گەرم
***
بەیانی بوو مناڵی ورد
لە سەرتەختی سنگێکی ڕووت
لێیان نەنیشت ڕەنگی گۆگرد
کاتێ پەنجەی تاوان بزووت
***
گرمەی بۆمبا ژینی شێوان
سەمتووری پێکەنین شکا
لەگەڵ دەنگی شین و گریان
خوێنی ئارامی دڵ تکا
***
دیمەنی خوێناوی بەسام
دڵی مناڵانی داخ کرد
بەدەستی دوژمنی هیوام
گەلێ مناڵی ساوا مرد
***
ڕیزبن: سنگی ئێوەو تفەنگ
مل کەچ بوون بۆهێزی کوشتن
کوردینە بە ڕیز بەبێ دەنگ
وەرن بۆ بەردەمی مردن
***
یادێ وەکوو شیری ئاگر
ئەدا لە درەختی هەستم
یادێکی غەمگین و نەمر
چنگ ئەنێتە دڵی پەستم