شەوە شیرن خەوی تۆ، هات و نەهاتی دڵی من
خەمە خاوانی کەناری کش و مانی دڵی من

شەوە دیسان و سەمای بەرقی نیگاهی بەشکۆت
ئەی فیدای چاوی گەشت بێ گەشەساتی دڵی من

شەوە زەنگی سەرە ژێری تەمەنی من وێدەچێ
دوور لە باڵات وشکە ڕۆ بێ قڕ و قاتی دڵی من

خەمی بێ تۆیی یە دەمباتە ڕچەی دەربەدەری
لە خەویشدا نەدەهاتی لە چی قاتی دڵی من؟

سەرە دەر ناکەم و سەد شێوەیە ئەما دڵەکەم
دەڵـێ هاتووی بۆ نەجاتی، نه وەفاتی دڵی من

هەر هەواڵێ کە دەبیسم خورپەیەک نایە لە دڵ
کە لەتۆ دێ خەبەرێ دەشکێ سەباتی دڵی من

تابەکەی تارە لەچاوم، سەرەسوێی چاوی ڕەشت
خەم بە بێ هۆ نیە خۆی کردە خەڵاتی دڵی من

وەرە ئەوشۆ مەرهەمێ دانێ لە سەر زامی بە سۆم
چ دەبێ دەستی شەفات بێ بە نەجاتی دڵی من؟

دیدەکەم باری خەمی تۆیە دەگێرێ، هەر وەها
چەمەەڕایە و بە تەما بۆچی نەهاتی دڵی من؟

هەمە ئاواتێ هەتا هەم لە سەرم ناچێتە دەر
کە لەشەڕگەی ئەشقی تۆدا بێ خەباتی دڵی من

ڕۆژی ڕوو دەرخە لە ژێر پەردە شەوم با بزڕێ
شەوی دڵ ڕوونە لە یانەی ڕۆژەڵاتی دڵی من

وەکو شیرین و شەکەر خەندە بکە بێژە سڵاو
فەرموو پێ داخە لەجەژنی سوور وساتی دڵی من

دڵە خورپە، هەوەسی ژوان و هەوای بێ خەبەری
چەندە خۆشە لە پەنام بی تۆ بە هاتی دڵی من