عەجەب شۆخی لە نەفحەی پەرچەمی پڕ چینی موشکینی
ئەسیری سەڕسەڕی نیسیانە ئێستا نافەیی چینی

لە بەیتی ڕوومەتی خاڵی سیاھی وەک حەجەر وایە
کە بۆیە عالەمێ ئێستاکە وا موشتاقە بۆ دینی

لەبۆ باغی نەزاکەت نەونیھالێکە سەمەن بۆیە
لەگەڵ بەرگی بەھەشتی ڕەشک ئەدا ئەندامی سیمینی

لە زەخمی چەشم، یا ڕەب دوور کەوێ گوڵزاری حوسنی یار
ڕواوە سونبولی خۆشبۆ لە سەر ئەو سنگی نەسرینی

ئەمیر ئیبنی ئەمیرە، ھەم لە حوسنا میری میرانە
لە دنیا دین ئەکا یەغما، عەقیقی لێوی شیرینی

تەماشاگاھی ڕوخساری حەمەد بەگ تا مویەسسەر بێ
ئەمن چ بکەم لە خولد و کەوسەر و گوڵزاری ڕەنگینی

لەگەڵ عوششاقە گوفتی ھەر بە خەنجەر ھەممی ئەو شۆخە
خودا بمکا فیدایی خەنجەر و دەستی بلوورینی