کە ڕۆیشتن، وا نەزانن
کەمتەرخەمیم، ڕێی لێ تەنیم
وەک ڕۆژان و شەوانی زوو
هیچ نەخەوم، پێشتان کەوم
بە هەورازی کوێستانی هات و نەهاتا
هیچ نەسرەوم، هەر سەرکەوم
کۆڵی خەم و ئەندێشەتان
یان توێشەبەرەی کێشەتان
هەرچی هەیە و هەرچی ئەبێ
لێ وەرگرم، بۆ هەڵگرم

کە ڕۆیشتن، وەک دوو کۆتر
کە داتان لە شەققەی باڵتان
بەرەو هەوارگەی خەیاڵتان
بۆ سێبەری دارێکی دوور
دوورتر لە پێوانەی سنوور
هەرچیم هەیە،
هەرچی سۆز و هەرچی هەست و
هەرچی خۆشەویستیم هەیە
چی مایەی سەربەرزیم هەیە
گلێنەی دووچاوم هەیە
گەرمایی هەناوم هەیە
گزنگ و هەتاوم هەیە
هەمووی وەکوو چەپکە گوڵی
چەپکە دڵێ
لە وەختی بەڕێ کردنا،
کز وەستابوون لەگەڵ منا

کە ڕۆیشتن، وەک شەپۆلێ
لە دەریای ئەم ژیانەدا
گێژاوی ئەم جیهانەدا
بۆشاییەک لرفەی ئەهات
لە قوڵایی ئەم گیانەدا
من و ئەوانەی وەک منن
لە خەمی دوورییا ونن
ئەم دابڕان و جیاییە
نوخشەی وەرزی کۆتاییە

کە ڕۆیشتن، بەهرەی شیعر
لەبەرچاوم لێڵ و پێڵ بوو
وەکوو جاران
هونەر و پەیامی نەما
دڵی شاعیر، وەکوو ساڵان
سەبووری و ئارامی نەما
گەش بینم و بەبێ ئێوەش
وەختە بڵێم، وەکوو ڕۆژان
ئەم ژیانە تامی نەما
کامی نەما