ئەپرسی گەر لە ئەحواڵم نیگارم سوێن بە چاوانت
ئەسووتێم هەر وەکوو قەقنەس لە شوعلەی ماهی تابانت
ئەناڵێنم وەکوو بولبول لە عەشقی ڕووی گوڵت جانا
ئەسووڕێمۆ بە بێ هۆشی لە حەسرەت سەروی بۆستانت
تەماشای ناوی جەرگم کە بە تەجرەبە دولبەر
بزانە چۆنە ئەحواڵم بە تیری چاوی فەتتانت
بە ئوممێدی ئەمەی جەژنە و لە جەژنا کینە نامێنێ
ئەوا خۆم خستە بەر پیێ تۆ و دەخیلە دەسم و دامانت
نیگارا مەوسیمی جەژنە و نزیکە ڕۆژی ئازادی
هەموو کەس عەفو و ئازادە منیش توو خۆتو ویجدانت
عەزیزم تۆ حوکمداری و منیش کەمتەر غوڵامێکم
بەڕاسی عەیبە بۆ تۆ قین لە گەڵ کەمتەر غوڵامانت
ئەوەندە عەرز ئەکەم چاوم لە ڕیێ خوا دا جەفا بەسیە
بکە فکرێ بە حاڵی خۆت و ڕۆژی حەشر و دیوانت
نیگارا گەر بە ئەحواڵم تەرەححوم تۆ نەکەی ئەمجار
بە ڕاسی دۆزەخە جێگات لە گەڵ تەرسایە دیوانت
وەها حاڵی مەبە قوربان گوناهبار نیت لە دەرگای حەق
کراما کاتبین بۆ من گەواهن وان لە سەر شانت