ئەمان سووتام ئەوا مردم لە لام ژەهراوە ئەم ژینە
خوایا یا نەجاتم دە وە یا خود مەرگی من بینە
ئەمێستە وام لە حاڵێکا نەبێ کافر بە ئەحواڵم
فرەنگ ئیسلام ئەکا یاران کزەی ئەم جەرگە ئارینە
دەمێکە دێتە گوێم ئەی دڵ دەنگی گریانی مەحزوونت
دەبا ببڕێتەوە مردم بەسە کۆتا کە ئەم ژینە
ڕەفیق گوێ بگرە لێم تۆزێ ئەوا مردم
ئەگەر ڕێت کەوتە لای یارم بڵێ ئەو شۆخە بێ دینە
بە ئێشی وەسڵی دیداری ئەوا ڕۆییم و من نەمدی
موحەقەقمە لە قەبریشا زووبانم ویردی ناڵینە
ئەگەر ڕەحمی لە دڵدایە کەمێ ئیمانی لا ماوە
ئەبێ تەشریفی خۆی بێنێ لە سەر ئەو قەبرە خوێنینە
ئومێدم وایە ئەحیا بووم برا گیان من لە خۆشیانا
بە بێ شک وەک دەمی عیسایە لام ئەم لوتفە شیرینە
فەقەت ئەحیا ئەگەر هاتو وتی ناردوومە سەر قەبری
بڵێ وەعدی من و ئەو لای خوای ختم النبیینە
ئەمە مەعلوومە من کوشتە و شەهیدی ئەو کەمان ئەبرۆم
گەواهم حازر و مەوجوود لە بەرما کفنی ڕەنگینە
بە وەڵڵاهی ئەبێ یەخخەی لە دیوانی خوا بگرم
وەکوو مینە بڵێم ڕەببی حەققی مەزڵوومیم بستێنە