ڕۆژێ جە ڕۆژان نە شوێن هەوارێ
دیم کەفتەن وە خاک تاقیەتەیارێ
واتم ئەی تاقیەی سیا پەرچەمان
تەقیم جەمین شوخی سێو مەمان
واچە تۆ ئیعجاز زاتی پێغەمبەر
مشکینی وە بۆیی موشکی کام دولبەر
سێوانی پەرچەم کام نازەنینی
کۆنەی کڵاوزەڕ کام مەه جەبینی
وە پشت سەرەو لاگیرەی شیرین
کام شۆخ تۆی کەردە تاقیەی زێرین
هاتە ئە زوان تاقیەی بێچارە
وەی تەور دا جواو لەو شوێن هەوارە
واتش پرسیارێ ئەی تاقیەی تەیار
مشکین بۆی وە بۆی موشکی کام نازار
کڵاوزەڕ نە سەر نەونەمامێ بووم
شۆخی سیاچەم گوڵ ئەندامێ بووم
ئاهووی خوتەن بۆ باڵا عەرعەرێ
قامەت زەڕستوون نازک دولبەرێ
سەرگۆناش چێمان پەڕەی تازەی گوڵ
سەحەر بە پشکۆ وە نەوای بوڵبوڵ
دیدەش وە سورمەی قودرەت ڕەشتەبێ
دڵداران وە داغ باڵاش کوشتەبێ
توڕەی توغرایی چین سیا پرچشەن
سێوانی سەرخاڵ ناو سینەو مەمشەن
ترفەی سفیدەی چاڵی تین بێگەرد
چون ئاوی حەیات جە تۆش مەوج مەوەرد
نازار نەوهاڵێ مشکین حوقەی ناف
سەر دەلیلەی گەل نازارانی جاف
جارجار ئێواران وە ناز مەگێڵا
کەردەوە عەوداڵ چی بی جە خێڵا
نامم کەردەبێت وە تاقیەی فەڕەنگ
ئیستەیش مەوینی کەفتەنم وەی ڕەنگ