چە بکەم من جە دەس شوومیی بەختەکەم
باز ئاوورد وە سۆ زامان سەختەکەم
گرپەی بڵێسەی کوورەکەی دەروون
ئێدەن سەر ساوان وە سای گەردوون
زڵەی زایەڵەی دڵەی پڕ جە دەرد
بۆی کزەی کەباب هەناسانی سەرد
ئەمشەو مەشنەوم مەیۆ نە گۆشم
مەدۆ نە دەماغ، ڕەم کەردەن هۆشم
فەڵەک داد جە دەس ستەمکارییەکەت
کۆتاش نەکەردی خوێن خوارییەکەت
هوونم نەکەردەن فەڵەک جە سای تۆ
جەفات سات وە سات پەی من زیاد مەبۆ
هانا هەی هاوار چەواشەی کەچ ڕەو
وەسەن تا کەی بووم من نەتەقڵە و دەو
تا کەی وێڵ هەرد سیابەختی بووم
تا کەی دڵ هوونین زامان سەختی بووم
تا کەی غەرق گێژ لێڵاوی خەمان
وە وێنەی مەجنوون ئاوارەی هەردان
وەسەن وەس جەنو ئازارم دەرۆ
کەم وە قار و قین تاقیوم کەرۆ
من چێشم کەردەن داد جە بەدڕاییت
جە جەور و ستەم جە ناخوارییت
ساتێ بەو ڕازە بەل دڵم شاد بۆ
وە وێنەی مینە جە خەم ئازاد بۆ