نە ڕاگوزارێ...
ئارۆ دیم وە چەم نە ڕاگوزارێ
ئاهووی خوتەن بێز تەرلان تەوارێ
جەیرانی سەرمەس دیدە خومارێ
تووبا قامەتێ هەیئەت ڕەعنایێ
تاووس خسڵەتێ سەوڵەت زێبایێ
پەرچەم پەرێشان وە وێنەی نەسرین
جەمین درەخشان چون نەجم و پەروین
چەمان وە پرگار مانی کەشیدە
چون هیلالی نەو ئەبڕۆ خەمیدە
چەمانش دایم بێ مەی پڕ خومار
سیا چون دیدەی جەیرانی تاتار
چون سوبحی سادق نە زوڵماتی شەو
ڕوومەت مەدرەوشا جە تۆی زوڵفی ئەو
لەبان شیرینتر جە شیرین شەکەر
مەواچای غونچەی وادەی سوب سەحەر
چەنەش چون نارنج بەغدایی ڕەنگین
خەیلێ دڵگیرتەر جە چەنەی شیرین
مینە پەرچەمش سیاو پڕ چینەن
چەمان خەرامان شۆخی شیرینەن