مەولام زامی تۆ...
مەولام شەرارەی سەختی زامی تۆ
قەسەم بەو کەسەی من جیا کرد جە تۆ
بەو تەور پێکیان دڵەی ڕەنجەڕۆ
چە حەکیمەن گشت وەنەش جەم بۆ
تاوەڕۆی مەحشەر ساڕێش نمەبۆ
مەولام بەو کەسەی هەمتاش نیەن
باکش جە کافەی ماسیواش نییەن
دەردی دوریەکەت هیچ شفاش نییەن
زامانی هجرانی تۆ دەواش نییەن
هەر کەس وێنەی من پەی تۆ بەدحاڵ بۆ
مەبۆ تا مردن شێت و عەوداڵ بۆ
مەولام بێ نازی دیوان خانەکەت
کزی و کەساسی ناو دیوانەکەت
ماتی و دڵتەنگی ئەهلی یانەکەت
کارێ پێم کەردەن بەو قۆرئانەکەت
تا جە سەر بسات ساتێ ژینم بۆ
مەبۆ من دایم ناڵە و شینم بۆ
مەولام من ناڵە و دەردەکەی کاریم
شین و فیزاع و زەبوونی و زاریم
واوەیلای وەگورم ئیش ئەوگاریم
کزی و کەساسی و ئەی گیان ئەوگاریم
وا لە سەراسەر جە مەهجووریی تۆ
بێلە گشت جە ئێش دەردی دووریی تۆ
مەولام سەرداران ئەمیرانی عێڵ
مەولام ڕەئیسان کۆمارانی خێڵ
سەراسەر غەمبار ڕاشان بیەن وێڵ
مەواچان فەڵەک لێڵاییت با لێڵ
ئەو گەورەی دڵسۆز میللەت ها نە کۆ
مەولام پاشاکان ئەمیران جاف
دیقەت دان عەشرەت وێشان بێ خلاف
غەیر جە تۆ نەدین میری ساحب لاف
ڕوتبەی ڕیاسەت وە یەقین ساف
----------
سپەردەن وە تۆ واچە دومای تۆ
وەکی لایق بۆ ئەو تەخت، ئەو شکۆ
مەولام من شەرتم پەرێ وێم کەردەن
وێنەی فەرز فەرزم گەردان وە گەردەن
کارم دمای تۆ تا ڕۆژی مەردەن
شین و زاری بۆ هوونی دڵ وەردەن
نە جاگەی شادی و دڵ خۆشیم هەر ڕۆ
بەرگم قەڵاخی و ویرم ڕۆڕۆ بۆ
شەرت بۆ تا مەیۆ قابیز پەی مەرگم
هەتا مەورازان کەفەن پەی بەرگم
نەجاگەی سەیران گوڵزار و مێرگم
چون ئاو جاری بۆ هووناو جەرگم
تا ساتێ بەقام جە سەرزەمین بۆ
مەبۆ من پیشەم شین و گرین بۆ
ئەی ڕۆمەن ئەی ڕۆ میری لەنگم ڕۆ
ئەیڕۆ سەرداری خوسرەو ڕەنگم ڕۆ
ئەیڕۆ ڕۆستەمی ڕۆژی جەنگم ڕۆ
ئەیڕۆ شازادەی ساحب دەنگم ڕۆ
ئەێڕۆ سەرگەورەی عێل جافم ڕۆ
ئەیڕۆ ڕەئیس ساحیب و لافم ڕۆ
ئەیڕۆ پەی وارس حاتەمی سانی
ئەیڕۆ پەی ڕەئیس عێلی مورادی
ئەیڕۆ وێنەی تۆ کێ وە دڵشادی
جە دوای تۆ بیکا مەجلس ئارایی
لێل گەورە و بچووک دڵ پاک جە قین بۆ
خەندان وێنەی گۆڵ کەلام شیرین بۆ