لە دووری قامەتت جانا هەتا کەی دڵ بە ئەفغان بێ
بڵێ پێم تووخوا تاکەی وەها سووزان و بریان بێ
دەپرسی گەر لە ئەحواڵم نیگارا دوور نییە وەڵڵا
لە عەشقی شەمسی ڕوخسارت دڵم وەک شەمعی گریان بێ
لە جەمعی عاشقانت دا عەزیزم هەر بە تەنها من
دەبێ تاکوو مەماتم تێ بەراتم تیر و پەیکان بێ
دەزانم تا وەکوو ئەمرم نیشانەی تیری برژانگم
هەتا ڕۆژێ حەیاتم بێ ئەبێ دڵ زار و ناڵان بێ
فەقەت بەم موژدە دڵشادم شەهیدی عەشقی باڵاتم
ئومێدم هەس لە مەحشەردا حسابم لێل شەهیدان بێ
کە مائیل بوو بە نووری ماهی ڕوخسارت دڵم زانیم
لە جەننەت دا ئەبێ جێگام لە سەحنی باغی ڕیزوان بێ
دەکەن مەنعم ئەڵێن مینە لەبەر چی وێڵی هەردانی
دەڵێم لۆمەم مەکەن عاشق ئەبێ ماوای بیابان بێ