ئازیز قەسەمم وە سای دەسماڵت
وە چینی پەشێو زولفی سەر خاڵت
وە دیدەی سیای مەخموورت قەسەم
وە خاڵی جەمین پڕ نوورت قەسەم
وە تەوقی هیلال ئەبرۆی خەمیدە
چەمان وە پەرگار مانی کەشیدە
وە بەرق و شوعڵەی شەمعی سەر گۆنات
وە چلیپای پێچ ئەگریجەی تاتات
وە ڕەنگی نارنج چەنەی سیمینت
سوێن وە ماویی خاڵ لەوحەی جەمینت
وە شنۆی شەماڵ سای شەدەی بێگەرد
وە بەرقی ئەڵماس پای گوارەی زەرد
وە ساقی گەردەن سافی بلوورت
وە عیشوەی گۆشەی دیدەی مەخموورت
وە سەروی باڵات جە عالەم تاکت
دیسان وە سەفحەی ڕوخساری پاکت
وە گشت قسەم بۆ قیبلەکەم سەد جار
ئیعتبارت بۆ جەیرانی تاتار
باوەڕت بۆ پێم ئاهووی خەتایی
نەم گرتەن جە تۆ ڕای بێ وەفایی
ساتێ بێ مەیلیت نەویەن ژیانم
مەیلی تۆم باعس ڕۆحی ڕەوانم
من وەی ئیخلاس و تۆ وەو هەراسۆ
وەو دڵەی چون سەنگ خوا نەناسۆ
مینە وەی هووناو دیدەی پڕگرین
مەدۆ دەغالەت وە پای گوڵ جەمین