دڵا پێم خۆشە قوربانی قەد و باڵای نیگارێ بی
لە سایەی ئەو نیگارە تا لە جوملەی بەختیارێ بی
چ خۆشە من کە سەییادی جەوانان بم لە چۆڵ و هەرد
بە شەرتێ تۆیش لەناویانا غەزاڵەی ناو نزارێ بی
بە جوانی خۆت مەنازە ئەی جەوانم بەسیە مەغرووری
بەڵێ وا فەرز کرا غونچەی گوڵێکی نەوبەهارێ بی
ئەکەم گیانم فیدای خاڵی سەری گۆنات بە جان و دڵ
بە شەرتێ تۆیش هەتا ماوی لەسەر قەول و قەرارێ بی
جەوانم خۆت بپارێزە لە ئاه و ناڵەیی سینە
مەبادا خوانەخواستە بەر دوعایی دەردەدارێ بی
نییە باکم هەموو ڕەنجم عەبەس بڕوا وەکوو فەرهاد
بە شەرتێ هەروەکوو شیرین بە دڵ بۆم غەمگوسارێ بی
نەما تاقەت لەژێر باری غەم و هیجرا ئیتر بۆ چی
لەسەر ئەم باری هیجرانە دیسان تۆیش نیوەبارێ بی
بە خاکی پات قەسەم یارا نیاز و مەقسەدی ئێمە
وەهای پێخۆشە تا ماوی گوڵی غونچەی هەنارێ بی
وەرە ئەسپی بەلاغەت لنگ بدە عورفی لە مەیدانا
کە بەڵکی تۆیش لە ڕیزی شاعیرانا نیوەسوارێ بی