حاجی تەمامەن...
نوخت ئەوەڵ ئاخر گردین تەمامەن
وەعدە نەمەندەن ئاخر کەلامەن
مەعلووم بۆ چەلات یوم القیامەن
بەدان موبتەلای دەرد و ئالامەن
فیرقەی پاک تیننەت چە شاد و کامەن
بەدان گرفتار ڕای چۆڵ شامەن
یاران وە ڕەفتار ڕای دین خودامەن
سەر چاوەی یاران سەیید و مامەن
بەدان ڕووسیا حزوور شامەن
نێکان سەر ئازاد سەف مەولامەن
دەورێ ناڕاستەن عەجەب پەیغامەن
فەقێ شەو و ڕۆژ فکرت چەلامەن
مەڵڵا گیر وەردەی دەست نەفامەن
پەی دیدار یار هەر ئا دۆعامەن
زات دوڵ دوڵ سوار پشت و پەنامەن
حرس و نەفس غاڵب شەوق و تەڵامەن
ئەرێ ڕەهبەر گیان یە چە بەڵامەن
پەی جیفەی دونیا عەشق و جەلامەن
بێ خەوەر چە کار حاڵ برامەن
دایم پەی بەدی چوون و چڕامەن
کار، کاسبیمان یەکسەر حەرامەن
ئی دام دوڵاب پا پێچ پامەن
مەعلوومەن چە لات خەیاڵم خامەن
کەلام پەی شاهید وێنەی ئەنامەن
ڕاسی هەر ئێدەن وەبێ خیتامەن