برا خرۆشان...
سەراسەر عالەم پەی جەنگ خرۆشان
دیک دەروونم سەر جە نۆ جۆشان
یەک یەک پەیدا مۆ گەوهەر فرۆشان
خەڵات مەکریۆ فیرقەی مەی نۆشان
فەوت و فەنا مۆ گرۆی ئاڵۆشان
شەخر سواران نییەن هاملۆشان
سواران غەیب دونیا مەپۆشان
سەف ئاڕای لەشکر جە چەهار گۆشان
پەی قەتڵ و قیتاڵ یەکسەر مەکۆشان
زۆمڕەی مونکیران مەبۆ پەرێشان
عەجەب کوشتار مۆ تێشان وە ئاشان
ڕەونەق دار مەبۆ قەدیم قوماشان
دونیا مۆ بەهەشت سەیر و تەماشان
عەدوی ئەهلی بەیت دەروون خراشان
یەکسەر باتڵ مۆ صوم صەڵاشان
جای بیئسەل مەسیر مەبۆ وەجاشان
زیانەی دۆزەخ شێخ و مەڵڵاشان
خود بین، خود پەسەن نییەن حەیاشان
دەفتەر دار مەکۆ یەکسەر جیاشان
وەغەزەب مەبۆ کار ڕیاشان
تاریک مۆ زوڵمات شوعلەی چراشان
تەمام قەتع مۆ مەلجا و پەناشان
هاشا پێغەمبەر ناکا ڕەجاشان
ئەر خودا جە عەبد وێش نەبۆ ڕازی
فایدە نەدارۆ سەد مەڵڵا و قازی
خالیق جە مەعبوود ئەر نەبۆ خۆشنوود
ڕەجای پێغەمبەر هیچ نەدارۆ سوود
گونام کیبارەن وەزن هەزار ڕەطڵ
مەعلوومە الفتنه اکبر من القتل
یوم لا ینفع مال ولا بنون
جە ئایەی فورقان کەردەن ڕەهنموون
الا من اتی الله بقلب سلیم
تەحریرەن جە صوحف کەلام قەدیم
قەت واتەن نماز صوم چەنی صەلات
مەنفەعەت دارۆ پەی ڕۆژ هەی هات
هەرکەس سالم بۆ وە دڵ و وە گیان
وەبێ پرس و جۆ یدخل الجنان
جە قالوا بلی جە وعد الوعید
کەس نمەزانۆ شەقی یا سەعید
مەر خالیق وە وێش زانۆ کێ خاسەن
کەمتەر گشت عالەم مەڵڵا عەباسەن
ولا تقنطوا من رحمة الله
ئومێدەوارەن پادشاه و گەدا
بەڵێ وەحەدیس دەلیل و بورهان
خالیق وە مەخلووق وێش کەردەن بەیان
مەعلووم جە فیرقەی گوناه کارانم
کەلب کەمتەرین قاپی یارانم