بەرزان هیلالتار وەروان قەرار دا
غوڕەی شاری شۆر دڵان دیار دا
نەسیم وە بۆی چین چنووری ڕووی هەرد
سوب سەباحولخێر دەماخی دڵ کەرد
جە پرژەی شەونم نە تۆی پەردەوە
نەرگس مەسمەس چەم وڵاو کەردەوە
سەوزە وستەن فەرش ئەو چەمەن دەس دەس
گوڵان جام وە دەس بوڵبوڵان سەرمەس
مەنعم مەکەردێ گرانەن دەردم
ئەر شێویا بۆ قافیەی فەردم
فەریاد جە شۆرەی ئەرزی چارەی من
هەر سەوزەی موراد من نا دیارەن
داد جە هەوای شووم بەد ستارەی من
هەر نەو گوڵاڵەی من نە پێوارەن
یا وەلوەلەی دەف شا دەروێش، جۆشێ
بەو سەدای ڕیشەی دڵ ئاشناوە
یا جۆشی سەمتوور موتریب، خرۆشێ
چەنی ئەی دوو فەرد حەسرەت مەعناوە
بەڵ سەوز ببۆ تۆم ئارەزوەکەی دڵ
های چەمە دەخیل شەوێ شەونمێ
بەڵ ڕوو بنمانۆ ئەو نازک نەو گوڵ
دەمە نەسیمێ وادەی سوب دەمێ