لوای بینایی دیدەی دەروێشان
ئاسان کەرد جە لام موسیبەت کێشان
خەم، خەفەت، مەینەت، هەناسانی سەرد
هەر کام مەیۆ، بۆ، سەفاییش ئاوەرد
ئەر کەفتەو مەحشەر دینی جەماڵت
وەرنمەدۆ دڵ دامنەی خەیاڵت
ناپەیدای تەوەن دوور بێسەفەرەن
سەفەر بێ لەشکر، لەشکر بێسەرەن
مەیدان نە دیدەی سوپایی تارەن
شۆڵەی تاسکڵاو تۆ نە پێوارەن
تا فەڵەک مەودای نەی تۆ شاردەوە
داوودی ڕەواج پەیدا کەردەوە
تا شێری بەیداخ تۆ ئاما وە بەر
نە گۆشەی بێشەی نەی فەوجی لەشکەر
دلێران «یا شێر ئامان» موانان
شێران وێنەی شێر بەیداخ منمانان
ئیسە عام کەردەن مەرگت دلێری
شێری بەیداخان منمانان شێری
وەهار نەوگوڵان نە تۆی خاک بەر کەرد
جە بەدبەختی من تۆ وە تۆی خاک بەرد
وادەی خاو نییەن، وادەی شکارەن
دەشتەکەی پای هەرد شاکەل دیارەن
بەو هیلالی ناڵ کومەیتی خۆشدەو
مانگی شادی و زەوق هەردان بکەر نەو
حەلقی جەیرانان تەشنەگی بێشۆن
ئینتیزاری ئاو سافی تێغی تۆن
تاریک بی شەوگار شەو زیندەداران
گیریا تەمام بەدری ڕوخساران
شێویا یانەی دەروون پڕ خاران
کنیا دەستەی زوڵف شیرین نیگاران
سیاماڵ ماتەم، سەرکۆمار دڵتەنگ
تەڵەبە پەشێو، مەدرەسە بێدەنگ
هیچ دیار نییەن کەست جەویر بۆ
مشێو گەرمیان خاکش دڵگیر بۆ
هەر ساڵێ چەند وەخت سەر هەردی لەیلاخ
وە بۆی هامدەمیت دەماخ مەکەرد چاخ
دڵەی گەرمیان نەو چەند وەختەدا
مەسۆچیا وە جۆش دووریی سەختەدا
ئاخر گەرمیان ساڕێش کەرد زامت
بی وە هامدەمت تا ڕۆی قیامت
دەردی گەرمیان وە ئێڵاخ یاوا
گەرمیان وە حاڵ ئێڵاخ دڵ تاوا
مەرگی بێوادەت عەجەب ڕەنگێ ڕەشت
شین وست ئەو دنیا، شادی ئەو بەهەشت
دنیا شینشەن نییەنی تێشدا
بەهەشت شادیشەن مەگێڵی پێشدا
نازاران پڕ داخ تۆ تەشریفت بەرد
حووران وە پەرداخ تۆ تەشریفت بەرد
هەر یەند ڕۆ ڕۆم کەرد ڕۆم نەبڕیاوە
ئای ڕۆم بڕیاوە، ڕۆم نەبڕیاوە
تاکەی چەنی شین ڕۆ وە سەر بەروون
با وە سۆزی دڵ دوعایێ کەروون
ئەر ئێمە مەحرووم دینت بیم یەکسەر
تۆ شاد بی وە دین خوداو پەیغەمبەر