ئەی شوکرێ تە جەوهەرێ زەبانی
وەی زکرێ تە سەیقەلا جەنانی
ئەی واحدێ بێ شەریکێ یەکتا
وەی واجدێ بێ نەزیر و هەمتا
ئەی باقیێ بێ زەوالێ دائم
وەی هادیێ بێ فەنایێ قائم
ئەی خالقێ ئەرز و ئاسمانان
وەی خالقێ جوملە ئنس و جانان
مولک و مەلەک و فەلەک ب جارەک
بلجوملە تە چێکرن تەبارەک
سبحانکَ کلما خلقتَ
أحسنتَ فکیفَ ما فلقتَ
هەرچی کو تە چێکر ئەی نکووکار
هەر یەک د حەدێ خوە دا سەزاوار
ئەڤ نەه سەدەفێ د پڕ مراری
دوررێ د سفید شەفاف و تاری
حەفتێ د مسال دوڕێ غەلتان
هەر شەش جهەت و چهار ئەرکان
هەر سێ وەلەدێ د پڕ مەوالید
غەبرا و سەما دگەل مەقالید
لەوح و قەلەم و سەوابت و عەرش
حەیوان و نەبات و مەعدەن و فەرش
زاهر کرن ئەڤ قەدەر سەنائع
پەیدا کرن ئەڤ قەدەر بەدائع
هەر یەک ژ عەدەم کرن تە پەیدا
ئبداع کرن تە بێ هەیوولا
فی الجملە چ ئەووەل و چ ئاخر
القصە چ موئمن و چ کافر
هەر یەک ژ تە ڕا وە بوونە مەزهەر
ئەو ڕەنگە د وان تو بوویی موزمەر
بێ حوسنێ تە نینە وان وجوودەک
بێ نوورێ تە نینە وان نوموودەک
حکمەت ئەوە باتنی و زاهر
قودرەت ئەوە غائبی و حازر
نینن تە تەجەززوء و تەمەککون
ئەمما وە د وان دکی تەوەتتون
گۆیا هەمی جسمەکن تو جانی
گۆیا هەمی شەهرەکن تو خانی
حوسنا تەیە زینەتا حەبیبان
ڕەشکا تەیە غیرەتا رەقیبان
مەیلا تەیە عاشقان دکێشت
دەردێ تەیە دل ژ بەر دئێشت
شیرین تە کرە شەکەر ل پەرویز
فەرهادی ژ ڕەنگێ ئەشکێ خوونریز
لەیلا تە کرە بەلا ل قەیسی
ڕامین ب تە ڕام بوو ل وەیسی
یووسف تە چڕا نەما زولەیخا
وامق تە کوسا گهاندە عەزرا
شەیخێ وەکو پەنجە حەج ب ژاری
دین کر تە ژ بۆ کەچا کوفاری
نەیلۆفەرە نازپەروەری کر
ئەو ژی تە ل مهرێ موشتەری کر
بالایێ بلند تە دایە سەروان
پابەندێ بەلا تە دا تە زەروان
سۆرگول تە کرن ژ خارێ پەیدا
بولبول تە کرن هەزار شەیدا
خوەش ڕەنگی تە دا گیایێ سۆرگول
خوەش دەنگی تە دا نەوایێ بولبول
ڕۆناهی تە دا سەرێ شەمالان
پەروانە تە کر ب شەوقێ تالان
مەحبووب تە چێکرن د دلگەش
مەجزووب تە پێ کرن موشەووەش
ئەڤ عشق و مەحەببەتا د دل دا
ئەڤ زولفێ موسەلسەلێ د مل دا
ئایا نە تە چێکرن موقابل؟
هەر یەک تە ب هەڤ کرن موعادل
ئایینە تە چێکرن موکەررەر
حوسنا خوە د وان تە کر موسەووەر
ئایینە ل پێشی تووتیان گرت
داڤەک تە ل پێشی کووڤیان گرت
ئایینە ژ وان وەیە کو ئاڤە
ئەو عەکسە ژ وان وەیە کو تاڤە
نەقشێ تە دبینن ئەو د ئاڤێ
ناکن حەزەرێ ژ ئاڤ و داڤێ
لەب تەشنە دکن تەلەب زولالێ
وێ دانە و دام و زولف و خالێ
مەقسوود بوو کو ژ پێشڤە حازر
دێ قەسدێ بکن جەمیعێ نازر
تووتی ب خوە ما شەکەر دڕێژت
هەرچی دبهن ئەوی دبێژت
وێ مەقسەدێ موختەسەر دبینن
پابەند دبن گەلەک دمینن
مەقسوود و مورادێ دل تو شایی
ئەمما تو تضلٌ منْ تشایی
هەرچی تە دڤێ ببەی زەلالێ
پابەند دکەی ب زولف و خالێ
هەرچی کو تو بینی سەر هدایەت
ڤێڕا بکری بکەی عنایەت
حازر وی دبی مەقامێ مەعلووم
گەر خادمە وی دگێڕی مەخدووم
بێ سەجدە تە ئەی جەنابێ مەعبوود
ئادەم کرە قیبلەگاه و مەسجوود
عیسا تە کوسا گهاندە ئەوجان
ئایا ب چ تە حەباندە ئەو جان
دەرسا کو ب خەف تە گۆتە ئدریس
ئەلبەتتە دچوو مەقامێ تەقدیس
ئبلیسێ فەقیرێ بێ جنایەت
هندی تە هەبوو د گەل عنایەت
هەر ڕۆ ژ دکر هەزار تاعەت
لەورا کو تە دا وی ئستتاعەت
وی سەجدە نەکر ل غەیری مەعبوود
گێڕا تە ژ بەر دەرێ خوە مەردوود
یەک سەجدە نەبر ل پێشی ئەغیار
قەهرا تە کرە مخلد النار
القصه ژ حکمەتا تە ئاگاه
فەردەک م نەدی تبارک الله
عرفان تەلەبێ د ساحب ئدراک
دەر حەققێ تە گۆتی: ما عرفناک
خانی ب نەزانیا خوە دەر حەق
گومراه ببت نە دوورە ئەلحەق
ئللا کو مەگەر موعین خودا بت
یا ڕاهبەرێ وی موستەفا بت
یا رەببی ب حەققێ موستەفا کەی
خانی ب خوە ڕا تو ئاشنا کەی