من گوناحم چیە؟ بۆ کایە بە ئەفکارم ئەکەی؟
شێتە، خۆم شێتی ئەوینتم، ئەدی بۆ هارم ئەکەی؟

شێر لە نێو بیشەیی خۆیدا بێ لەهیچ کۆ ناکا
کەچی تۆ ئاسکێ سڵی هەر بەنەزەر، تارم ئەکەی

شاعیری کۆڵنەدەری ڕۆژی خەبات بووم وکەچی
تۆ بە شەونامەیێ قاچاخی شەوی تارم ئەکەی

چ خەتایێ لەمنی ملکەچی ماچت دیوە؟
نامەوێ دتدەمەوە، بۆچی خەتا بارم ئەکەی؟

شیعری من ڕۆژێ وەکوو کادۆ لەبۆ یار دەبرا
ئێستە بەم پیریە بۆ گاڵتە بە ئەشعارم ئەکەی؟

من وشەو شیعرو شیعاری پوفەکیم پاکی بەزاند
تۆ لەسەر تیشکی گەلاوێژێ منەتبارم ئەکەی؟

شایەری ڕەشبەڵەکی هێزی خەبات بووم وکەچی
حەیفە لەو پەنجە گوشیانەکە بێزارم ئەکەی

جاری وایە لەسنە دەمکەیە شای شیعر وغەزەل
جاری واشە لە شنۆ، بێ قەڵەم و زارم ئەکەی

ئاڕەشێکم کە لەسەر زۆریی سنوور گیانم ئەدەم
بەنیشانەی حەسەدی تیری کەماندارم ئەکەی

ئێستە مەیدانی وشەی شیعر و ئەوین پڕ لە ڕیان
من کە هەر راستیە ڕێم، تووشی خەتی خوارم ئەکەی

هەستی من نوورە لە ئاسۆ وە بەشەو دەردەکەوێ
بە نیگای چاوی حەسەد تووشی ڕچەی نارم ئەکەی