وەل کۊچەباخەگان واێا ئاشناترم!
ئوو وەرد هەوش‌خەڵوەتەگەێ پەپوولەیلا
ک ئاسمانە!
چەوەیلم ــ ئی تیرئاسارەیل سزیاێە ــ
ڕێویارەیل 'کوومەڵە ‌ــ هەسارەێگ لە پەرتخ فڕین'ـن
لەورە ک
هەواگەێ ئاوس و هەڵگر 'بارسایی ڕەوان ڕاسی'ـیە.
حەح! خونچە و گوپکەیل هۊرم،
چ بوو 'هەڵگەردیان لە مەودایل'ـێ دێرن!
ئوو دڵم، هامچڕەێ لاڵکە و نقاێ بەرزەچڕەیلە و
هامنەواێ دەنگ گوڵ بەێان ــ ک وەک ڕووح ئاو نزیکە! ــ
ئگەرد چەم، گیانەڵگیانی‌ترم!
هەێک زڵفەیل شووڕ پڕ ئەژ گوڵدەمەیل کوچگینێ ئەۊکەرێ و
ژەگیان‌ــ وێیەردە،
لەناو قەڵپەنجەێ خاک‌خوڵین تین و گڕۆ، شەهید دووێ.
وەگەرد داران، ڕازێ دێرم
ئەوان داڵگەیل وەدی هاتن دوجارەێ منن!
گەرد ئەور، خزم هاوخۊنم و
لەشم قەڵ‌ــ یادگارێگە ئەژ تامازروویی هشکەڕوو.
کلکەیلم، زەۊزارەیل پڕاپڕ لە گەنمن و
ئەڵ برج کڕکپ و خامووش دەنگم
هۊچ داوڵێگ پاسەوان نییە.
ئەز لە درێژەێ قۊلاییەگان تیەم
لە هزارتووەگەێ پێچەڵپێچ وەسەرهات ئاغ و ئەڵسان
ئوو ڕیشگەیلم، خەوەیل ئەۊڕاس‌یەتەێ زەمینن!