لیپاوەیل وێیەردە
هن منن
ئوو قایخەیل باێەوانیی بۊچک
وەرد کوومەێ ڕێوارەیل بژناس.
لیپاوەیل لە بەرزیی ڕەپاوڕەپ و ئاشکراێ گابەردەیل
وە چوارمێخە کیشریەن و
قایخەیل
دە لەنگەرگەیل شڕ و چووڵ‌هووڵ
ئارام ئارام لەنگەر گرن.
م
وەگەرد لیپاوەیل و
قایخەیل باێەوانیی بۊچکم
دەریاێگم
نیقەڵتووز گیانەوەرەیل بۊچک و پڕژمار پرسیارەیل
ک خوەێان خزاننە ناو قۊلایی سەوز و دێز ئاوانم.
دچمەو نووا
وە لەف.
ژە 'کووردا'ـێ هاتمە
تا بچمە 'کووردا'ـێگ
وە گوڕەگوڕ
ئەژ خوەم
وەرەو خوەم!
ئەوەێ ک دە ئاسووەیل وەراوەر
لە هڵاتن واژاوەێ وەدی تیەێ
منم
ک تا دۊرتر لە 'م' دانیشتێیە.
هەر ئەوجوورە ک دە ئاسووەیل پشت سەر
ئەوەێ ک لە خوەراواێ واژاوەێگ ئەڕا ڕەوانە کردنم وساگە
منم
ک تا نزیک‌تر لە 'من'ـە!
... لیپاوەیل ئێرنگە
هن منن
ئوو قایخەیل باێەوانیی بۊچک
وەرد کوومەێ ڕێوارەیل نەناس.
گاهس ڕووژێ ک لیپاوەیل
ژە بەرزایی لێڵ و گۆنگ گابەردەیل بانان داوەزن و
قایخەیل
دە لەنگەرگەێ ئەژ جوگرافیاێ 'هەبوون یا نەبوون'
سەفەرێگ نوو بنیا بنەن،
نەهەنگەیل هێمن
ئەڵ پانتایی ئاوان سەوز و دێز ــ واشم
ورسییەرییان شکانۊن!