کە ڕووبەڕووی نیگات دەبمەوە
هەموو نەخشەی ئەقڵم تێکدەچێت و
تەمی سەرلێشێوان
دەبێتە داگیرکەری شاری مێشکم

ئەمە تەنها بینینێکی سادە نییە
کاتێ چاوم لەسەر وێنەی تۆ دەنیشێت
دڵم دەبێتە چەقەخانەی لێدانێکی یاخی
کە هیچ سنوورێک و هیچ هێمنییەک ناناسێت؟

ئەم بینینە…
کەسایەتی بێدەنگم دادەوەشێنێت و
جەستەم لە ئاستتدا، چۆک دادەدات
من لێرەدا دەستەوستان و قۆڵبەستم

بەڵام مەیگرە لێم...
ئەوە 'من' نیم کە وا دەکەم
ئەوە جەوهەری من و خەسڵەتی عەشقە
کە منی لە نێوان عەقڵ و هەستدا
ئاوا وێران و سەرگەردان کردووە.