لە نەخشەی جیهاندا، ئێمە تەنیا ڕەنگێکی شێواوین
وەک پیتێکی ونبوو، لەناو کتێبی مێژوودا جێماوین

هەموو گەلان خاوەن ماڵ و چرای خۆیان و ئاڵان
کەچی ئێمە هەر میوانین لەسەر خاکی باوو باپیران؟ !

ئێمە جەستەیەکین بێ سێبەر، هەناسەیەکین بێ خەبەر
چەوساوە و بێ مافین، لەگەڵ ئەوەشدا بوین دەربەدەر

لەم بازاڕە گەورەیەی جیهاندا، کە هەموان پشکیان برد
تەنیا ئێمە بووین، کڕیاری خەم و فرۆشیاری دەرد

دەوڵەت بۆ ئێمە خەونێکە، لە ژێر باری ستەم دەمرێ
هەموو ساڵێ بە خوێنی گەش، لاپەڕەیەکمان دەدڕێ

لە جێی مۆر و پاسپۆرت و سێبەری قایمی دیوار
بۆمان ماوەتەوە تەنیا، کێلی شەهید و ناڵەی زار

بۆچی دەبێ هەموو دنیا، خاوەن سنوور و ناو بن؟
کەچی کوردان لەناو ماڵی خۆیاندا، هەر غەریب بن؟

چەوسانەوە لای ئێمە، تەنیا وشەی ناو کتێب نییە
نیشانەی قامچی و، ئاسەواری زیندانی و ئەبەدییە

هەموو ڕۆژێ، نیشتمانم لەناو جانتایەکدا دەپێچرێتەوە
لەکۆچێکی نوێدا، مێژوومان لەسەر جادەکان دەنووسرێتەوە

ئەم زەوییە، کە هێندە پان و بەرین و بێ کۆتایە
بۆچی تەنیا بۆ پارچە خاکێکی ئێمە، جێگەی تێدا نییە؟

ئێمە ماندووین لە بوون بە سووتەمەنی بۆ ئاگری کەسانی تر
تینووی ئاڵایەکی خۆمانین، تینووی دەوڵەت و مافی خۆمان!

هەتا کەی بێ نیشتمان و بێ ناونیشان و بێ دەوڵەت؟
ببینە یەک، با کۆتایی بێت ئەم هەموو جەور و مەینەت.