پێم بڵێ باران خو قەرار بوو
لە هەور بێی نەک چاوانم
قەرار بو تۆ زەوی تەڕ کەی
نە وەک گۆنەی بێ تاوانم

باران هەر کەس پێی گووتی
خۆشم دەوێی بڵی درۆیە
بڵێ ڕاست نیە قسەکانت
چەتری دەستت بە کام هۆیە

پێم بڵی باران کەی دێیە خوار
تاکوو دڵم ئارام وەبێت
سەدان ڕۆژ بە یادت بووم
بەڵام ئاسمان هەر ساو دەبێت

باران تۆ دوایین هاورێی بۆ
ژیانی بێ بارانی من
باران بەس تۆ ئارامشی
بۆ نێو جەستەو بۆ گیانی من

باران ژیان مەرگەساتە
تۆزێک خۆشی بۆتە ئاوات
ڕێژنە کە بەسەر وڵاتم
پڕ بە دڵ هاتووم بۆ داوات

باران دونیا کۆیلەتیە
تۆ نەبارێی دڵتەنگ دەبین
بە وشەکەرۆیی و بێزاری
بەرەو ناخۆشی و جەنگ دەچین

باران توخدا دور مەبەوە
دوری تۆ کۆتایی منە
زەوی گەنمی وڵاتەکەم
بێ تۆ چاوە ڕوانی سنە

باران لە سەر شاخ مەبارێ
بێ گوناحی لێن بە نێو کۆڵبەر
لەسەر دەریاکان مەبارێ
چونکا پێ دا دەڕۆن کۆچبەر

ویستت ببارێی لێرە ببارێ
بشوە پیسایی ناحەزان
بشوە ڕق و قین و نەفرەت
پاک کەوە مرۆڤی پێ نەزان

هێند ببارە لافاوێک بێت
بە ئاو داچێ هەر چی سووکە
بەسەر مێشکیان دا ڕێژنە کە
خاوێن بێ ئەو مێشکە پووکە

ببارێ بەسەر ئاوری زوڵم
با وەکوژێت و دامرکێ
کۆلکەزێڕینە وەدەر خە
بۆ دیتنی دێنە بەر دەرکێ

باران بۆخۆت چاک دەزانی
وڵاتم قڕی قومە ئاوێکە
تونیایەتیمان چاک دەبێ
بەڵام ئەویش بۆ تاوێکە

بن خاکمان پڕی زێڕ و نەوتە
لەسەر خاک سواڵکەری دەکەین
ببارێ بۆو نەهامەتیە
بۆ ژیان کۆڵبەری دەکەین

باران ببارە ئەم جارەش
جەستەی وێرانم گەش کەوە
جارێکی تر وەک منداڵی
قژە سپیەکانم ڕەش کەوە

جارێکی دی بۆ ئاخر جار
بڕژی بەسەر ژیان و دنیام
چاڵ و قوڵکە کان پڕ کەوە
هێور کەوە مێشکی تەنیام