ڕاستت دەوێ خۆم زۆر بە بەختەوەر دەزانم کە ماوەیەک لەمەوبەرەوە کاکە ڕەحمانی میسباحم لە تاران ناسی و بووینە ئاشنا، ئەمما چۆن ئاشنایەک؟ خێروبێر بێ و بەسەرتدا ببڕرێ، وەک سەد پوورە مێشەنگوێنم لە کوللۆرەدارێکدا دیبێتەوە وابوو.
کاکە ڕەحمان خوا شوکور هێشتا لە تەمەنی لاوەتی بەو لاوە نەچووە. جگە لەوەی لە تایەفەی قازییەکانی مەهابادە، دایکی خودا لێخوشبووشی هەر کیژی شاعیری مەشهوور، مەرحوومی سەیفەلقوزاتی بەناوبانگە. کاکە ڕەحمان دەنگی زۆر خۆشە و بەیت و باوی کەونارای کوردانەی زۆر لەبەرن و زۆریشی نووسیونەتەوە‎٠‏ هەر کەسێکی ماوەیەک دەگەڵی نەژیابێ و هونەر و کردەوەکانی نەدیبێ، نازانێ ئەو پیاوە چەند لەبار و ڕۆح سووکە. کتێبخانەیەکی وەسەریەک ناوە، وه‌خته‌ بڵێم سەری مار و مێرووشی تێدایه‌، هه‌رچی بووبێته‌ کتێب و لە بازاڕان دەسکەوتبێ، کوردی، فارسی، لە هەموو بارێکی ئەدەبی، تاریخی، سەیاحەتنامە و چی و چی... لەلای ئەو کۆبۆتەوە. بۆخۆی، کوردی کە زمانی خۆیەتی و تورکی ئازەری و زمانی فارسی باش دەزانێ، سەرەرای ئەوەش کە لە عەرەبیدا وەکوو خۆم کۆلکەمەلایە، هەرچی کتێب بە عەرەبیش نووسراون یان هەر بە خەت ماون وا لای ئەون، تەنانەت کتێبی شەرح و تەفسیر و حەدیسی عەرەبیشی هەن، من لەوساوە کە ئەم پیاوەم ناسیوە و دۆستایەتیمان بەستووە، خوا وەتحەسێنی لە کتێب کڕین، کە ئەم ڕۆژانە کاری حەزرەتی فیلیش نییە، حەساومەوە. هەر کتێبێک باسی بکەن و بڵێن دەبێ بیخوێنیەوە، هەر کتێبێک کە بۆ تەحقیقات لەسەر کردن پێویستم بێ، هەر ئەوەندە بەسە کە بە تەلەیفوون پێی ڕابگەیەنم، هه‌رگیز نەیگوتووە نیمە، فەورەن زۆر بە ڕووی خۆشەوە بۆی هێناوم. تەنیا گله‌ییەکم کە لێی هەبوو ئەمە بوو کە ئەم هەموو یادداشتە بەنرخانەی چۆنە چاپ و بڵاو ناکاتەوە، زۆر لەو بارەوە سەرکۆنەم دەکرد، تا ئاخری خوا و ڕاستان قسەی نەشکاندم و بڕیاریدا کە بۆ جاری یەکەم سیلسیلەی مەشایخی نەخشبەندی بە پەخشان بنووسێتەوە و لە چاپی بدا، بەو گفتە دڵی خۆش کردم، ئەم جار من پێشنیارم پێ کرد کە «براکەم! هەر وەک ئەم کارە بەخێرە پێکدێنی، وەرە و بە دەردی عارەب کوتەنی «الاحسان بالاتمام»، تۆ بەر لەوە تەئلیفەکەی خۆت چاپ بکەی شێعرەکانی حەزرەتی مەولانا خالید کە بە فارسی و هەر وەها سیلسیلەی مەشایخی نەخشبەندی کە سالار سەعیدی حەیدەری نەزمی کردووە و ئەو سیلسیلەش کە من لە ساڵی ‎١٣٢٤‏ی شەمسیدا کردومەتە شێعری کوردی وەپێشیان خە، با هەموو موخلیسانی تەریقەی نەقشبەندی ڕازی بکا و شایەت بە دوعایەکی بەخێر یادی تۆش و ئەوانەش کە بەر لە تۆ ئەم کارەیان کردووە، بکەنەوە.
بەپێویستی دەزانم بڵێم کە کاکە ڕه‌حمان کتێب کڕە و ئەڤینداری کتێب خڕکردنەوەیە، نە کتێبفرۆشە، نە هیچ چاوی لەوەیە کەسێ لە بەرانبەر کتێب لێ وەرگرتنیدا شتێکی بداتێ کە بە بڕوای من چاکترین خێر دەکا و خوا موەففەقی بکات.
بە هومێدم بەم زووانە یادداشتە بەنرخەکانی هەموو بە چاپ بگه‌ن و خوێنده‌واران شاد بکا، ئینشاڵڵا ئه‌م هومێده‌م پێک دێ.