خان مه‌سۆر:

شاکه‌ رازان دیم، شاکه‌ رازان دیم
وه‌ دیده‌ت قه‌سه‌م عه‌جه‌و رازان دیم

وه‌ که‌ماڵ مه‌یل دڵنه‌وازان دیم
جفتێ ماسک له‌ لێو سه‌راو بازان دیم

ماێشته‌ێ دارایی دان له‌ ده‌ور به‌ێ
گاگا چو سه‌رسه‌وز ده‌لیا مه‌که‌ن ته‌ێ

ماێشته‌ێ دارایی دان له‌ شه‌که‌ر نه‌ێ
یه‌ک یه‌ک چۊ ماهی ده‌لیا مه‌که‌ن ته‌ێ

ماێشته‌ێ دارایی دان له‌ ده‌ ور ناف
دان وه‌ گڵاڵا زوڵف کڵاف کڵاف

له‌ ئاو دراتن خاڵ وه‌ رێشته‌وه‌
خان مه‌سۊر دیێان له‌ مانێشته‌وه‌

ماسک سه‌ر ره‌وێشت نواێ ماسکان هه‌ێ
له‌ خشه‌ێ سه‌رمل وێش هه‌راسان هه‌ێ

گام گوڵ ریژ نه‌و خه‌رامان هه‌ێ
قی قه‌ێ باڵا به‌رز سووسه‌ن خاڵان هه‌ێ

سپاێ سه‌ونزو دێز نه‌و وه‌هاران هه‌ێ
زڵه‌ێ زوڵف شور سه‌ر سواران هه‌ێ

گه‌ل گه‌ل نازاران پێچ دان وه‌ گه‌رده‌ن
تووز باێ شه‌ماڵ له‌ رو خاڵ به‌رده‌ن

گه‌ل گه‌ل نازاران سووخ شکار چاو
وه‌ پانجه‌ێ شمشاڵ یه‌ک مێان قه‌شاو

له‌ سه‌ر سیه‌ قڵا له‌ لاشه‌ به‌تن
په‌ریه‌ت بواچم کول کورپه‌ دێه‌تن

له‌ ئاو دراتن جه‌ڵا دان سه‌روه‌ن
سه‌ف دان چۊ که‌ڵ ره‌م دیار ده‌رون

وێنه‌ێ که‌موته‌ر شه‌قه‌ دان له‌ باڵ
وه‌یه‌ێ عه‌ێنلا داخڵ بۊن وه‌ ماڵ

دو دوڕ دو یاقوت دو دانه‌ لاڵ دیم
له‌ رو دو سینه‌ دو قوپه‌ێ زاڵ دیم

وه‌ الله‌ وه‌ تاقیق دو شه‌خس له‌ێ ره‌نگه‌
گوڵ سفێد وێنه‌ێ داناێ فه‌ره‌نگه‌

هه‌ردگیان وه‌ هه‌م تۊله‌ نه‌مامه‌ن
داێم خه‌دێشان وه‌ سورمه‌ جامه‌ن

گه‌وره‌ له‌ وێنه‌وێ نه‌مام له‌ ئاوا
بۊچگ له‌ وێنه‌ێ نه‌و تۊل ساوا

گه‌وره‌ له‌ وێنه‌ێ سوور گوڵ له‌ باخان
بۊچگ له‌ وێنه‌ێ به‌ره‌زاێ شاخان

بۊچگ له‌ وێنه‌ێ ره‌نگی مه‌ناره‌
گه‌وره‌ له‌ وێنه‌وێ ئسپێ چناره‌