(١)
من شاعیرێکی شێت ڕادەسپێرم
پاش ماڵئاوییم ئاگادارم کا،
لە دڕکەڵانی مێژووی گیانوەرێن
بە چی خەمڵیون زەمەند و بژوێن:
پەلکەزێڕینەی خەونی شاعیران،
یا گەندەخەونی قاچاخچییانی خوێن؟ !

(٢)
هەرچی هەیە، هەمووی خەونە.
خەون دنیای داگرتووە:
ئەوهێلانە دنووکچنەی با بۆڕ دەدا،
وەختێک خەونی باڵدارێکی بێوار بووە.
ئەو درەختەی،
کە پایزان
بە زێڕ زمڕووت دەنەخشێنێ،
بە خەونۆکەی دەنکەتۆوێک قیت هەڵچووە.
لە هەر جێیەک،
لە هەر لایەک،
کە بینیتان وا ئاڵایەک
دەشنێتەوە بە هەواوە،
سوور بزانن،
نیوەشەوێک
یەکەم تەقەڵ شاعیرێکی شێت لێی داوە!

(٣)
هێندەم خەونی جوان بینیوە
ئێستا باڵام،
لە بنپێوە تا تۆقی سەر،
کانی و مێرگ و خەونستانە.
تۆش، وەتی هەی،
هەر جێگەیەک پێت بیسمێ
خوێن و قاتی فایلستانە!