ئاشکرایە کۆریایییە باکوورییەکان (شیمالییەکان) کۆمۆنیستن. ھەرچی منیش بە ئایین موسوڵمان و بە باوەڕی سیاسی دێموکرات و بە شەرەفی جینسییە ھاونیشتمانێکی عێراقیم. بەڵام جیاوازیی ئایین، جیاوازیی ئایدیال، جیاوازیی پێڕەوی فەرمانداری (نیزامی حوکم) چییان ھەیە بەسەر ھەست و عاتیفەیەکەوە کە لە قووڵاییی سەرچاوەی ئینسانییەوە ھەڵئەقوڵێ؟ بە دوو چاوی زەق ئەبینم چەقۆ خراوەتە گۆشتی نەتەوەیەکی ئازای ئازاد، تەنیا لەبەر ئەوەی چۆن خۆی ئەیەوێ وا ئەژی، پاسەوانە ڕاستەقینەکانی دێموکراتییش بە ھەموو دڵڕەقییەک ئەڵێن: نەء، ئێمە چۆنمان ئەوێت ئەبێ وا بژییت!
ھیچ کەس نەزانێت ئێمە (دانیشتووانی ڕۆژھەڵاتی ناوەڕاست) باش ئەزانین ئەمانە ئەیانەوێ کڵۆڵی داگیرکراوی ژێردەستیان چۆن بژی!
ئەمجا، ئەگەر بە بۆنەی بەسەرھاتی داماویی کۆریاوە فرمێسکێکی دڵسۆزانە بەسەر برینی ھەردوولای ئەوانیش و خۆشمانا بڕێژم، باوەڕ ناکەم کەس بتوانێ زاتی ڕێ لێ گرتنم بە دڵا بھێنێ.
«گوڵاڵە برایمە... گری... گری / چووینە غەزای ناو گاوری» — فۆلکلۆری کورد
سینگمان ڕی: Syngman Rhee، ماک ئارسەر: Douglas MacArthur