لە وەسفی جوانیت ئەی یاری دڵدار
ئەم دوو سێ فەردە ئەڵێم بە یادگار
ئەبرۆت بە نەقش سونعی ئیلاهی
کێشراوە وەک تاق ئیقباڵی شاهی
چاوت گەلاوێژ پریشکە دێنێ
ڕوومەت ئاوێنە، ئینسان ئەنوێنێ
دەم کانی یاقووت، پڕە لە گەوهەر
زوبان شیرینتر لە شەهدو شەکەر
دوو زوڵفی ڕەشت هەر وەکوو ڕەشمار
ئاڵاوە لە مل نازگی نازدار
گەردی وەک بلوور، مینایی بێگەرد
شیرین و پەسەند وەک ئاڵتونی زەرد
زوڵفت وەک کەمەند، نێچیری بەهرام
بۆتە زنجیری دڵەی نابەکام
مەمانت نارنج، یا لیمۆی کاڵە
یا خود شەمامە یان پرتەقاڵە
گۆنات وەکوو شەمع، منیش پەروانە
بە حوسنت سووتام، جەرگم بریانە
سینەت بە وێنەی بەفری تازەو تەڕ
ساف و بێگەردی وەک بەردی مەڕمەڕ
نافەت عەترڕێز پڕ موشک و عەنبەر
پڕ لە ڕائیحەو بۆنی موعەتتەر
شەرتە مەزڵووم یش لەیلی نازپەروەر!
مەجنونی تۆ بێ تا ڕۆژی مەحشەر